Nizami Gəncəvinin anadan olmasının 880 illiyinə töhfə olan “Nizami Gəncəvi. Unudulmuş nəşrlər” kitabı BP şirkətinin dəstəyi ilə nəşr edilib.
564 səhifə həcmində olan bu dəyərli nəşrin “Libraff” kitab mağazasında geniş təqdimat mərasimi keçirilib. Tədbirdə BP şirkətinin Azərbaycan nümayəndəliyinin rəhbərliyindən Bəxtiyar Aslanbəyli, Tamam Bayatlı Önər, millət vəkili Rafael Hüseynov, kitabı nəşrə hazırlayan professor Nəsiman Yaqublu çıxış etmişlər.
Azərbaycanın tanınmış alimlərinin, ziyalılarının, media təmsilçilərinin iştirak etdiyi təqdimat mərasimində aktyorların və müğənnilərin ifasında Nizami irsi ilə bağlı şeirlər, mahnılar da səsləndirilib.
Kitabın tərtibatçısı, redaktoru və yazıları Türkiyə türkcəsindən transliterasiya edən professor Nəsiman Yaqublu “Nizami Gəncəvi. Unudulmuş nəşrlər” kitabının əhəmiyyəti haqqında bilgi verib: “Kitabımızın daha maraqlı olması üçün oxuculara Nizami haqqında ilk məlumatları yazmış Azərbaycan tədqiqatçılarının məlumatlarını da daxil etdik. Kitabda ilk dəfə olaraq Nizami Gəncəvi haqqında beynəlxalq efirdə “Amerikanın səsi” radiosunda yayımlanmış (1952-ci ildə) verilişin də mətnini təqdim etdik. Eyni zamanda N.Gəncəvi haqqında yazıların nəşr edildiyi mühacirət mətbuatı orqanlarının fotolarını və dəyərli arxiv sənədlərini də kitaba əlavə etdik. Nizami əsərlərindəki miniatürlər də ciddi işlənib yüksək keyfiyyətdə oxuculara çatdırılıb. Bundan əlavə, kitabda mətnin asan oxunması üçün fars, ərəb, osmanlı kökənli sözlərin lüğətini tərtib edib, müəyyən izahları da hazırladıq.
M.Ə.Rəsulzadənin “Azərbaycan şairi Nizami” əsəri də müəllifin üslubu qorunaraq və əvvəlki nəşrlərdəki qüsurlar aradan qaldırılaraq təqdim olunmuşdur.
Qeyd edim ki, sovet nizamişünaslığından fərqli olaraq, kitabda toplanmış yazılar ideologiyadan kənar araşdırmalardır və böyük şairin yaradıcılığının yeni çalarlarının öyrənilməsinə imkanlar açır.”
© Müəllif hüquqları qorunur! Mətndən istifadə etdikdə istinad mütləqdir!
