Şair Ənvər Əhməd vəfat edib

Şair Ənvər Əhməd vəfat edib.

Bu barədə APA-ya jurnalist Rüstəm Əbülfətoğlu xəbər verib. “Əmim, Azərbaycan Yazıçılar Birliyinin üzvü, Qarabağ Yazıçılar Birliyinin sədri, Azərbaycan Milli Yaradıcılıq Akademiyasının doktoru, "Tərəqqi" medalı və "Qızıl qələm" mükafatı laureatı, professor, filologiya üzrə fəlsəfə doktoru, Xankəndi Pedaqoji Universitetin keçmiş rektoru Ənvər Əhməd bu gün səhər saat 6 radələrində vəfat edib”, - deyə o bildirib.

Qeyd edək ki, Ənvər Əhməd 8 avqust 1943-cü ildə Ağcabədi rayonu Salmanbəyli kəndində anadan olub. Ağcabədinin 5 saylı şəhər orta məktəbində orta təhsil alandan sonra Bakı Statistika Texnikumunu bitirib. Azərbaycan Dövlət Universitetinin filologiya fakültəsində təhsilini davam etdirib. "M. Ə. Sabirin poetikası" mövzusunda dissertasiya müdafiə edib. AMEA Ədəbiyyat İnstitutunda doktorluq dissertasiyasını tamamlayıb.

"Dağ və mən" adlı ilk şeiri 1962-ci ildə "Ağcabədi pambıqçısı" qəzetində dərc olunub.

Allah rəhmət eləsin!