20 il qabaqkı mükafat yenidən təqdim olundu - FOTOLAR

 

30-31 oktyabr tarixlərində Azərbaycan Nəşriyyatları İctimai Birliyi (ANİB) tərəfindən Sumqayıt şəhərində keçirilən və anşlaqla qarşılanan "I Sumqayıt Kitab Sərgisi" ANİB-2021 tədbirində sonuncu dəfə 20 il öncə verilən "Daş Kitabə" mükafatı yenidən təqdim olunub.

Edebiyyatqazeti.az ANİB-ə istinadən xəbər verir ki, mükafat həm ANİB üzvlərinin, həm də sosial şəbəkə vasitəsilə keçirilən sorğuda istifadəçilərin ümumi rəyi əsasında Sumqayıt və Bakı şəhərində yerləşən "Xan xəzinəsi" bukinistinin rəhbəri, uzun illərin kitabçısı Xan Rəsuloğluna verilib.

İlk və sonuncu dəfə bu mükafatı "Altun Kitab" Nəşriyyatının direktoru Rafiq İsmayılovun təşəbbüsü ilə 2001-ci ildə "Tutu" uşaq nəşriyyatının rəhbəri Tərlan Qorçu alıb. "Daş Kitabə" ikinci dəfə iyirmi il sonra ANİB İdarə Heyətinin sədri filologiya üzrə fəlsəfə doktoru, dosent Şəmil Sadiqin təşəbbüsü ilə təqdim olunub.

Qeyd edək ki, "Daş Kitabə" mükafatı kitabçılıqda fədakar fəaliyyətə görə nəşriyyat və ümumilikdə kitab sahəsində çalışan insanlara verilir.


© Müəllif hüquqları qorunur! Mətndən istifadə etdikdə istinad mütləqdir!