BÖYÜMƏDİ
Üç böyüdü dörd oldu,
Sevgi böyüdü dərd oldu,
Toxum böyüdü bitki oldu.
Pişik böyüdü pələng olmadı,
Hər böyüyən nəhəng olmadı,
yekəpər olanı çox oldu.
Uşaq böyüdü qoca oldu,
beşik böyüdü tabut oldu.
Həyat böyüdü ölüm oldu.
İnsan böyüdü, insanlıq böyümədi.
SAKİT OL
Qəbiristanlıqdan
ölüm qoxusu gəlmir heç zaman,
qışda qar ətri, yazda çiçək qoxusu gəlir.
Ey adam, qəbiristanlıqda sakit ağla,
şüvən salma;
burda dünyanın yuxusu gəlir!
ŞIRILTI
Hər kəs eşidər it mırıltısını,
qarğa qırıltısını,
göy gurultusunu…
Hər kəs eşitməz axan zamanın şırıltısını,
Əzrayıl açan qapının cırıltısını.
Heç kəs qulağın şəkləməsin,
ölümü bəkləməsin.
Onsuz da ölüm
ağlagəlməyən yerdə,
ağlasığmayan zamanda özü peyda olacaq.
ARI SÜRÜSÜ
Çəmənə uçuşan arı sürüsü kimi
uçuşurdu güllələr.
Arılar güllərdən şirə,
güllələr ürəklərdən can çəkirlər!
Arılar pətəyə döndü,
güllələr darağa dönmədi.
© Müəllif hüquqları qorunur! Mətndən istifadə etdikdə istinad mütləqdir!
