Rəbiqə Nazimqızı
Mənim ömrüm nağıldı -
nə gəzirsən içində?
Yoxdur bir qəhrəmanım
sən cilddə, sən biçimdə.
Sən bu dar küçələrdə
azarsan, karıxarsan.
Birdənəm, bu nağılda
özün də darıxarsan.
Axtarma almaları,
almalar əvvəl vardı.
Gecikdin, divlər gəldi,
gördü, aldı, apardı...
Sona çatır nağılım:
biri var, biri yoxdu.
Nə gəzirsən, qırxıncı
qapının sirri yoxdu.
Boylanma, baxma yola –
nə işıq var, nə də it.
Hələ ki görən yoxdu,
Gələn yoxdu, özün get.
© Müəllif hüquqları qorunur! Mətndən istifadə etdikdə istinad mütləqdir!
