Könül Arif
A CAPİTE AD CALCEM
I
Əlimi kilsə divarlarına sürtürəm
Nə qədər pıçıldasam da xeyir-duaları
Şər çağıdı -
Buludlar ötür dağ başında kilsənin üstündən
Buludları yarır kilsə qülləsinin xaçı!
Buludlar haçalandı
Buludlar al-qandı!
Aç ovuclarını
Ovucların - göyərçin qanadlarıdı...
Ovuclarına sıx duaları
Və xaçdan daman qanı!
II
Sübh çağı yumub gözlərini, açıb qollarını
Günəşə doğru qaçarkən
ayaqladığın o çörək qırıntıları
Daraşacaq vücuduna bir gün
Qarışqa misalı
Dalayacaq canını
Çörək qırıntılarıdı -
Canda qaçışan o min bir ağrı!!
III
Bir də görsən ki qəfildən
günəş batdı - sübh çağı
Bir də görsən ki ayaqlar düşdü taqətdən
Qollar çarpazlandı
Bir də görsən ki güllətək açıldı havaya
Qarğaların qanadları
Demək ki ŞƏR qarışdı!!
Demək ki ayaqları tutdu çörək ahı!
Və daha qarğalar şığıyar al buludlardan taa
Canındakı ağrılara sarı.
IV
Yumma
Göyərçin qanadlarını
Şər çağı.
ŞƏHƏR ADLARI
Səfər elanları yayıldı.
Enib uçuş qiymətləri ovuc içinə.
İndi bütün şəhərlərin adı
"Onu unutmaq"dı:
Bakı - Onu unutmaq - Bakı
Bakı - Onu unutmaq - Bakı
Qəbələ - Onu unutmaq - Qəbələ
Gəncə - Onu unutmaq - Gəncə
REPRİZ![i]
I
Sevgi ilə əllərin arasında - sözlər
inciklik
göz yaşları...
Bir duzlu damla dəyib dağıldı
əlin üstünə.
Sevgiyə dartınan əlləri
gözlər çəkib saldı
nəm çökəkliyinə.
II
Sevgi ilə əllərin arasında
bu uzanıb-qısalan yolda - əşyalar...
Əllərə
və sevgilərə görə dəyişir bu əşyalar;
mən
bir qutu şokolad,
iki kitab xatırlayıram
sənin o isti...
mehriban... ağ əllərində,
mənsə...
..........iztirablı...
......................ucsuz-bucaqsız...
............................................."Tatar çölü"nü uzatmışdım sənə
barmaqları
aprelə dolaşan
bumbuz əllərimdə.
III
Sevgi ilə dodaqların arasında - əllər quruyar...
Dodağımla toxunsam sevgiyə
qupquru
ağ
izsiz torpaq gizildəyər çöllüklərdə.
Bircə mənnn...
...................bircəəə...
.............................bircə mən
ölərəm o torpağın üstündə!
IV
Kölgəm -
məndən öncə uzandı torpağın üstünə...
Qabırğa ilə torpağın arasında - kölgə.
Torpağın üstündə
Qabırğa şəklində kölgə.
V
Sən
"bütün bunları yaz" deyirsən.
Mənsə
bunları yaşamaq, səsləndirmək istəyirəm.
Yaşamaq,
səsləndirmək
və ya
yazmaq arasında
qıvrılmaqdır ömür indi,
eynən yumub gözlərini
masanın bir ayağından o biri ayağına
qıvrılıb
quyruğunun ucunacan sürtünən o pişik kimi.
V
Bircə
səsləndirə bilmədiklərimi
rahatlıqla yaza bilirəm.
Məsələn:
"Mən səni...
................hələ də...
...........................sevirəm"
[i] fr. reprise - musiqidə notların
təkrarlanması
AD
Qəfildən açılan güllə kimidir
Bir ehtiyatsız dost dilində
Adının çəkilməsi
ORİQAMİ
Kağızdan düzələn gəmini
Dənizə atmaq kimidir
Qadının dünyaya gəlişi
ANA
Balaları qarnına sığınan ana dovşan
Qaçmır
Tirin ucuna zillədiyi baxışlarıyla
Titrəyə-titrəyə
Dayanıb dərinliyini ölçür
Ovçu ürəyinin
PENCƏK
Bir qadın vardı -
Havalıydı.
Axşamlar oğrun-oğrun
Zəmidəki müqəvvaya
Yemək aparırdı.
Demə,
Müqəvvanın çiyninə
İtkin oğlunun pencəyi salınmışdı.
Qadını görcək zəmidəki qarğalar
Qoynuna sıxıb yavrularını
Elə hey
Üzüyuxarı baxırdı.
Ağlayırdı qarğalar qadına,
Qarğa dilində
Ağlayırdı...
Sükut edirdi sünbüllər hər axşamçağı,
Qucurdu zəmi torpağı
Sinəsinə düşüb unudulan
Əzik-üzük buğdaları...
Ötürürdü küləklər bir-birinə,
Öpürdü küləklər cümlə-cümlə
Ana laylasını:
"Bu tikəni də ye, balam,
Ye ki, rahat yatasan.
Ağlayır, bax, qarğalar -
Hamısı da acdı ha,
Ye! Qalmasın onlara..."
© Müəllif hüquqları qorunur! Mətndən istifadə etdikdə istinad mütləqdir!
