Edebiyyatqazeti.az xəbər verir ki, Nicat Həşimzadənin “Boşluqdan qaçış” adlı ilk romanı işıq üzü görüb.
“Boşluqdan qaçış” adlı romanında gənc nəslin yaşadığı mənəvi boşluğun səbəbləri axtarılır. Romanda maddi çətinliyin sevgi münasibətlərinə necə əngəl olduğu mövzusuna da toxunulub. Müəllif kitabda əsasən yaradıcı adamların yaşadığı dərin boşluğun mahiyyətini və sənətə təsirini izah etməyə çalışıb. Həmçinin ölkəmizdə yaradıcı zəkaya sahib olan gənclərin problemləri də əsas qəhrəmanın dili ilə oxuculara çatdırılıb.
Boşluq daim bizi təqib edir, bütün həyatımız boyu boşluqdan qaçırıq. Romanda toxunulan əsas mövzulardan biri də ailə təzyiqlərinə görə gənc nəslin azadlığının məhv edilməsidir. Romanın qəhrəmanı cəmiyyətdəki bozluqdan və daxilindəki boşluqdan qaçır. Xilas ola biləcəkmi? Bu suala cavab tapmaq üçün romanı oxuyun.
Onu da qeyd edək ki, “Boşluqdan qaçış” müəllifin ilk romanıdır. Bundan əvvəl çap olunmuş “Qogenin ikinci qadını” və “İndulgensiya” kitablarında Nicat Həşimzadənin qısa hekayələri və publisist yazıları çap olunmuşdur. İyunun 30-u, saat 16:00-da kitabevim.az mağazasında kitabın təqdimat mərasimi keçiriləcək.
Giriş sərbəstdir.
Bütün ədəbiyyatsevərlər dəvətlidir.
© Müəllif hüquqları qorunur! Mətndən istifadə etdikdə istinad mütləqdir!
