Mədəniyyət Nazirliyinin təşəbbüsü ilə 2016-cı ildən etibarən həyata keçirilən “Azərbaycan kitabının dünyaya tanıdılması” layihəsi çərçivəsində Türkiyədə fəaliyyət göstərən “Zengin Yayıncılık” nəşriyyatı ilə əldə olunan razılığa əsasən, bu günə qədər klassik və müasir dövr olmaqla 27 azərbaycanlı müəllifin 38 adda kitabı tərcümə və çap edilərək türkiyəli oxucuların ixtiyarına verilib.
Nazirlikdən bildirilib ki, nəşr olunan kitabların siyahısına 2 elmi, 16 bədii əsər və 20 uşaq ədəbiyyatı daxildir. Onların arasında Nizami Gəncəvinin “Şah və xidmətçi”, “İsgəndərin Bərdəyə gəlməsi və Nüşabə ilə görüşməsi”, “Kərpickəsən qoca”, Mirzə Ələkbər Sabirin “Təmsillər”, Yusif Vəzir Çəmənzəminlinin “Qan içində”, Cəlil Məmmədquluzadənin “Danabaş kəndinin əhvalatları”, Yusif Səmədoğlunun “Qətl günü”, Əbdürrəhim bəy Haqverdiyevin “Seçilmiş hekayələr” I-II cild, Mir Cəlal Paşayevin “Bir gəncin manifesti”, “Füzulinin poetik xüsusiyyətləri”, “İki rəssam”, İlyas Əfəndiyevin “Körpü salanlar”, Fərman Kərimzadənin “Qarlı aşırım”, Məmməd Səid Ordubadinin “Qılınc və qələm” I-II cild, Cəfər Cabbarlının “Seçilmiş hekayələr” və digər əsərlər yer alır.
Layihə çərçivəsində 2 il yarım müddətində Azərbaycan kitablarının Türkiyədə tanıdılması işi uğurla davam etdirilib. Nəticədə Azərbaycan kitabının, ədəbiyyatının oxucusu günbəgün artmaqdadır. Gələcəkdə layihə üzrə Azərbaycan kitablarının tərcüməsi, çapı və yayılması işinin müxtəlif ölkələrdə də davam etdirilməsi planlaşdırılır. /Azərtac/
© Müəllif hüquqları qorunur! Mətndən istifadə etdikdə istinad mütləqdir!
