Lirik poema
Bayrağımız üstündədir torpağımızın,
Torpaq ilə nəfəs alır, nəfəs veririk.
Torpağımız altındadır bayrağımızın,
Biz torpağa toxum səpir, məhsul dəririk.
Bu torpağa biz daraşan qara qarışqa,
Bizim nəyimiz var torpaqdan başqa .
Əlçatmayan səmalarda
şaqqıldaşan odlu şimşəklər,
Biz görmürük,
Bu torpağın altında da şaqqa-şaq çaxır.
Bu torpağın bətnindəki göy biçənəklər,
Çörəyimiz, suyumuz da torpaqdan çıxır.
Sinəmizdə avtomat dönək Sarı Aşığa,
Bizim nəyimiz var torpaqdan başqa.
Bir-birinin davamı
Dağım, düzüm, qoruğum,
Kəpəz Göygölə aşiq, Göygöl Kəpəzə vurğun.
Layiq olaq bu eşqə, bu yara-yaraşığa,
Bizim nəyimiz var torpaqdan başqa.
Ev-eşiyin, həyətin,
Pəncərən, bacan, qapın…
Heç nə bizimki deyil!
Yalnız torpağa tapın,
Yalnız torpağa əyil!
Nə çatar bu dünyada bu sevdaya, bu aşqa.
Bizim nəyimiz var torpaqdan başqa.
Bizim heç nəyimiz yox,
Hər şey torpağımızda!
Güney torpağımızda,
Quzey torpağımızda!
Çörəyini, suyunu, havanı torpaq verir.
Dərdə düşüb üzülsən,
Dərmanını, çarəni,
Dəvanı torpaq verir.
Baş əy torpağındakı
Qırışa, qırışığa!
Bizim nəyimiz var torpaqdan başqa.
Gələcək əsrlərə, gələcək nəsillərə
Torpaq əmanətimiz.
Tarix tufanlarında
Millət, xalq olmaq üçün
Torpaq zəmanətimiz.
Bu əl-yaxa döyüşdə
Olmayaq başqa-başqa!
Bizim nəyimiz var torpaqdan başqa.
Yanardağ bu torpaqda,
Bu torpaqda Şahdağı.
Bu torpaqda kükrəyir,
Gur Yanarsu bulağı.
Bu torpaq tab gətirir,
Zevsin zərbələrinə.
Allahın əli çatmır,
Savalanın başında
Buzquş zirvələrinə.
Sütun şəlalələrin
Nərəsi, hayqırtısı
Bu torpağın ahəngi!
Üfüqlərin cilvəsi,
Güllərin əlvanlığı
Bu torpağın od rəngi!
Diqqət et bu torpağa
Rəng-rəng yağan yağışa,
Bizim nəyimiz var torpaqdan başqa!
Bu torpağın altında,
Bu torpağın üstündə
Bitməyən, tükənməyən
Canbir hərəkətimiz,
Qəlbbir hərəkətimiz,
Əlbir hərəkətimiz.
Azalmayan, çoxalan,
Artan bərəkətimiz!
Bənd olma dünyadakı
Bu qatma-qarışığa!
Bizim nəyimiz var torpaqdan başqa.
Torpaq ilə bağlıdır
Hər dərdimiz-sərimiz,
Sonumuz, əzəlimiz.
Düşmən gülüstanından qiymətli, dəyərlidir
Otumuz-əncərimiz,
Sapsarı yarpağımız,
Qupquru xəzəlimiz.
Qıyma yağı əl vursun
Bu torpaqda göyərən
Qanqala, sarmaşığa,
Bizim nəyimiz var torpaqdan başqa.
Torpağın məhəbbəti
Hər qəlbə açıq olur.
Su qarışsa torpağa
O dönüb palçıq olur.
Görən bu nədən olur?
Qan qarışsa torpağa
Böyüyüb Vətən olur.
Heç nə tay ola bilməz
Bu amala, bu aşqa,
Bizim nəyimiz var torpaqdan başqa.
Torpaq bizim gücümüz,
Qüvvətimiz, zorumuz!
Bizi millət eyləyən,
Bizi dövlət eyləyən
Ruhumuz, şüurumuz!
Günəşə şəfa verən
Şəfqətimiz, nurumuz.
Nə tən olar torpaqdan
Göyə düşən işığa?
Bizim nəyimiz var torpaqdan başqa.
Bu torpağa sevgimiz
Dünyalara səs edər.
Dünya durduqca onu
Şumlayıb suvarmağa
Al qanımız bəs edər!
Qəhrəmanların qanı
Sığarmı bir qaşığa?
Bizim nəyimiz var torpaqdan başqa!
Dağların zirvəsində
Əyilməzlik, dağ qürur
Əriməyən çalmadır.
Bu söz, kəlam, bu hikmət
Ululardan qalmadır:
"Düşmən təslim olursa,
Onu əfv etmək gərək.
Düşmən təslim olmursa,
Onu məhv etmək gərək!"
Torpağımı zəbt edən,
Təslim olmaq yerinə
Hər xəyanətə gedən
Qəlbi pozğun iblislə
Getmərəm barışığa!
Bizim nəyimiz var torpaqdan başqa.
Yalnız zəfər, qələbə
Ömrün, günün mənası.
Qoca dünya qaliblərin dünyası.
Yalnız zəfər, qələbə
Ötən günü, ayı, ili tarix edir.
Qoca tarix
Qaliblərin tarixidir..
Bakı, 20 aprel 2017 il
© Müəllif hüquqları qorunur! Mətndən istifadə etdikdə istinad mütləqdir!
