"Sartrdan üzr istəyib, Kamyunun kitabına əl uzadaram" - İradə Musayeva - DİLEMMA

Bəzən elə an gəlir ki, o vaxt seçim etməli olursan, özü də yaxşı və ya pis arasından deyil, iki yaxşı arasından...

Poeziya, yoxsa proza?

- Qərbin prozası, Şərqin poeziyası.

Rəsm, yoxsa heykəltəraşlıq?

- Rəsm. Heykəltəraşlıqda donmuş, süst və birmənalılıq olur adətən. Rəsm isə başqadır...

- "Molla Nəsrəddin", yoxsa "Füyuzat"?

- Hər ikisi. Biri olmasa XX əsrin əvvəllərindəki möhtəşəm oyanma səhnəsi yarımçıq görünər...

- Oxu tar, yoxsa oxuma tar?

- Oxu tar...

- Folkner, yoxsa Heminquey?

- Heminquey.

- Ənənə, yoxsa müasirlik?

- Müasirlik...

- Elm, yoxsa din?

- Elmli din...

- Aşıq musiqisi, yoxsa muğam?

- Əlbəttə, muğam...

- Sartr, yoxsa Kamyu?

- İkisindən birini seçmək şərtinə görə Sartrdan üzr istəyib, Kamyunun kitabına əl uzadaram... Kamyu

- Teatr, yoxsa kino?

- Kino. Teatrda səhvlər, çiyliklər çox olur. Hər oyunda, hər aktyorda. Kino isə mükəmməl və daha həyati, daha tanış cizgili olur...

- "Məhşər", yoxsa "İdeal"?

- "Məhşər". Çünki orda həm İ.Hüseynov var, həm də Nəsimi. Hələ üstəlik, filmində həm də Rasim Balayev...

- Düma, yoxsa Coys?

- Əslində Coys deməliyəm. Amma əsaslandırmaqda çətinlik çəkə bilərəm. Ona görə tanış, nisbətən doğma Düma...

- Realizm, yoxsa postmodernizm?

- İkisini də bir araya gətirə biləcək başqa bir "izm"...

- Hüseyn Cavid, yoxsa Cəfər Cabbarlı?

- Əlbəttə, H.Cavid. Sınmadığı üçün. C.Cabbarlı 1928-də artıq sovet dramaturqu idi...

- Sənət sənət üçün, yoxsa sənət xalq üçün?

- Sənət sənət üçündür.

- Heca vəzni, yoxsa sərbəst?

- Sərbəst.

- Dostoyevski, yoxsa Tolstoy?

- Tolstoy.

- "Əsərlərimi yandır" - deyə vəsiyyət edən Kafka, yoxsa dostunun sözünə əməl etməyən Maks Brod?

-Kafka.

- Bakı, yoxsa mədəniyyət mərkəzi Paris?

- Paris.

- Oxucunun istəyi, yoxsa müəllifin diktəsi?

- Heç biri. Həyatın özü...

Hazırladı:

M.AĞAOĞLU