***
Hara baxıram, şairlər:
bu çığıran şairlər,
bu bağıran şairlər,
bayatı, ağı deyən,
ağıstan şairlər,
qayanı, dağı döyən
dağıstan şairlər...
Təşbehi bəndin içinə
iki əllə atanlar,
mikrofon önündə
kəllə atanlar
(qeybət daşıyır taksi qulaqları,
asmaq da olmur bu ipiqırıqları)...
Razıyam:
yuxarıda,
aşağıda
yerinizi bərkidin,
bircə yaxadan tutub
danışmağı tərgidin,
bircə misranın qulağın
burub qışqırtmayın,
bircə şeiri oxucu
üstünə qısqırtmayın!..
© Müəllif hüquqları qorunur! Mətndən istifadə etdikdə istinad mütləqdir!
