6 fevral 2023-cü ildə qardaş Türkiyədə
son 120 ilin ən dəhşətli zəlzələsi baş verdi
Zəlzələ... dağıntı... itkinlik... ölüm...
Deməyin bu dərdi bölən olmadı...
Qaraya büründü millətim, elim,
Bəla hardan gəldi - bilən olmadı...
Bir yandan boz tüpü, bir yandan yağış,
Yel əsir bəyaz qar əprimlərilə.
Yerə soyuq dəyib bəlkə də bu qış;
Hərdən çabalayır depremlərilə...
Bu, necə bir şərin əmsalı, görən?!
Yoxsa bir seysmik suçmu, qınaqmı?!
Ya bir qərarsızmı qərarı verən?!
Qəfil fələk çəkən acı sınaqmı?!.
Uca dağlarımın qəddi bükülüb,
Quşlar qan ağlayır gözlərim kimi...
Donmuş şəlalələr sınıb-tökülüb
Dilimdə qırılan sözlərim kimi...
Mizrabla çırpılan amansız hökmü
Tarımda titrəyib car edir kök sim!..
Kövrək ovqatımın hüzn hakimi...
Yarğanlı ümmandır yaralı köksüm!..
Aman, bu nə fəryad, bu nə sitəmdir,
Özül də, divar da, daş da ah çəkir?!
Ruhumuza çökən elə bir qəmdir
Onu güc sahibi bir Allah çəkir!..
Böyüyüb, ucalıb bir ər olası
Neçə qırğı gözlüm yaş altındadır...
Yağılar gözünə neştər olası
Cavanlar, cocuqlar daş altındadır...
Əlləri qoynunda ata-analar
Qədim ulusun bel büküşü deyil...
Mərtəbə-mərtəbə çökən binalar
Basılmaz bir yurdun çöküşü deyil!..
...Yeddi günlük matəm... Keçəcək o da,
Keçsə də bizimdir ağrı-acılar...
Nələr itirsə də ötkün dünyada,
Ümid itirməsin qardaş-bacılar!..
Dön, bax ulu, dözgün genlərinə də;
Sənsən sərt sınaqlar içrə bərkiyən...
Sıxılma kədərli günlərinə də,
Qoy başın sağ olsun, məğrur Türkiyəm!
07.02.2023
© Müəllif hüquqları qorunur! Mətndən istifadə etdikdə istinad mütləqdir!
