Şamxal Rüstəm haqqında
.jpeg)
Bir dəfə onun haqqında yazmışdım ki, indi haradadır, nə iş görür, düzünü özündən savayı bir kimsə bilməz. Onu görənlər də soruşanda elə -yerlə-göyün arasındayam, deyir. Amma indi dəqiq bilir ki, yerdədir, torpaqla nəfəs-nəfəsədir...
Su kimi saf poeziyası ilə çoxlarının ürəyində taxt qurmuş gözəl şair Şamxal Rüstəm haqq dünyasına qovuşdu. Bir şeirində
Nə adla minmişdik bu qayığa biz,
Niyə düşünmədik bir azca qabaq.
Yenə dəli olub bu dəli dəniz,
O tay da uzaqdı, bu tay da uzaq,
- deyib.
İndi Şamxal Rüstəmi tapmaq üçün o tayla bu tayın arasında qalmalısan. Onun ən böyük bəlası özünə biganəliyi idi.
Və onu da deyib ki:
Dünya bənzər bir qalacıq bürcünə,
Sığınmışam bir balaca küncünə.
Bu dünyanın ölümü var min cürə,
Mən görəsən tuş olacam hansına.
Elə də oldu. Şəmkir rayonunun Dəllər qəsəbəsində ata ocağında, qısıldığı bir küncdə haqqa qovuşdu.
Məkanın cənnət olsun, şair.
© Müəllif hüquqları qorunur! Mətndən istifadə etdikdə istinad mütləqdir!
