Müasirlik ənənənin davamıdır
Bəzən elə an gəlir ki, seçim etməli olursan, özü də yaxşı və ya pis arasından deyil, iki yaxşı arasından...
Qonağımız xalq yazıçısı Elçindir
- Poeziya, yoxsa proza?
- Baxır yerinə.
- Rəsm, yoxsa heykəltəraşlıq?
- Sənət əsəri.
- "Molla Nəsrəddin", yoxsa "Füyuzat"?
- Hər ikisi. Yəni onları birləşdirən amal.
- Oxu tar, yoxsa oxuma tar.
- Aydın məsələdir ki, "oxu tar" Ancaq ümid edək, hətta inanaq ki, "oxuma tar"ı da konyuktura yox, siyasi romantika yaratmışdı və o dövrün gənc şairini lənətləməyək.
- Folkner, yoxsa Heminquey?
- Folkner.
- Ənənə, yoxsa müasirlik?
- Müasirlik ənənənin davamıdır.
- Elm, yoxsa din?
- Elm.
- Aşıq musiqisi, yoxsa muğam?
- Baxır yerinə.
- Sartr, yoxsa Kamyu?
- Onları qarşı-qarşıya qoymaq istəməzdim.
- Teatr, yoxsa kino?
- Teatr.
- "Məhşər", yoxsa "İdeal"?
- "Teleqram".
- Düma, yoxsa Coys?
- Baxır yaşa.
- Realizm, yoxsa postmodernizm?
- Yaxşı əsər.
- Hüseyn Cavid, yoxsa Cəfər Cabbarlı?
- Onları da qarşı-qarşıya qoymazdım.
- Sənət sənət üçün, yoxsa sənət xalq üçün?
- "Don Kixot", "Romeo və Cülyetta", "Anna Karenina"… sənət üçündür, yoxsa xalq üçün?
- Heca vəzni, yoxsa sərbəst?
- Yaxşı şeir.
- Dostoyevski, yoxsa Tolstoy?
- Tolstoy.
- "Əsərlərimi yandır" - deyə vəsiyyət edən Kafka, yoxsa dostunun sözünə əməl etməyən Maks Brod.
- Kafka. Ancaq Brodun xəyanəti olmasaydı, Kafka da olmayacaqdı.
- Bakı, yoxsa mədəniyyət mərkəzi Paris?
- Əvvəlcə Bakı, sonra Paris.
- Oxucunun istəyi, yoxsa müəllifin diktəsi?
- Baxır oxucuya və müəllifə.
Hazırladı: Mirmehdi AĞAOĞLU
© Müəllif hüquqları qorunur! Mətndən istifadə etdikdə istinad mütləqdir!
