Şux qamətli, orta boylu Adil Bəhlul oğlu Zeynallıya 85 yaşı heç kəs vermir. Nə zahiri görünüşünə, nə də yaddaşına, zəngin daxili dünyasına rəğmən. Bütün ömrünü pedaqoji sahəyə - müəllimliyə həsr edən, doğulduğu Leriki kəndbəkənd, oymaqbaoymaq tanıyan, buz bulaqlarının suyundan içən, təmiz mer-meyvəsindən dadan, yaşlılardan uzunömürlülüyün sirrini öyrənən Adili elə cavan saxlayan məmləkətimizin saf cənub təbiətidir, o axarlı-baxarlı dağlarıdır. Elə lirik duyğularını oyadan da füsunkar gözəlliklər olub.
Azərbaycan Yazıçılar Birliyinin üzvü Adil Zeynallı Lerik əhalisinin sayına və sanbalına, ziyalı potensialına görə ən iri yaşayış məntəqəsi - Ceyrudda dünyaya göz açmışdır. Böyük Vətən müharibəsinin başladığı 1941-ci ilin 13 noyabrında 1963-cü ildə ADPU-nun pedaqoji fakültəsini əla qiymətlərlə bitirən bu dağlar oğlu tələbəlik dövründə yaradıcılığından geri qalmırdı. Şeirləri tez-tez Lənkəranda çıxan zona qəzetində, "Leninçi"də, "Gənc müəllim"də, daha sonra "Bolluq uğrunda" adlı mətbu orqanında (Lerik) dərc olunurdu. O, doğma rayonun Tikəband və Çayrud kəndlərində Muğan qışlağındakı Lapatin məktəbində müəllimliklə yanaşı qəzet və jurnallarda əməkdaşlıq edir, məqalələr yazır, Bakıdakı ədəbi mühitlə əlaqələr qurur, tez-tez Yazıçılar Birliyində şeirlərini oxuyurdu.
Vaxtilə respublikanın məxfi orqanlarında çalışan atası Bəhlul kişi Cənubi Azərbaycanın Nəmin qəsəbəsindən idi. Daim yurd eşqi ilə ürəyi çırpınırdı. 1978-ci ildə Lerikdən Binə qəsəbəsinə köçən Adil müəllim təqaüdə çıxana qədər 101 saylı texniki peşə məktəbində çalışmışdır. Heç vaxt qələmini yerə qoymayan təbli, nəğməli dostumuz böyük ailə yükünü çəkməklə bərabər, söz yükünü də ürəyində daşımağa imkan tapmışdır. Şeirləri 65 ildən çoxdur respublikanın qəzet və jurnallarında - "Azərbaycan"da, "Qobustan"da, "Ədəbiyyat və incəsənət"də (indiki "Ədəbiyyat qəzeti"ndə), "Azərbaycan gəncləri", "Sovet kəndi"ndə, "525-ci qəzet"də çıxmışdır. İndiyədək peşəkar şairin yeddi şeir və publisistika kitabı müxtəlif mətbəələrdə çap olunmuşdur. "Günəş cənubdan doğur", "Könlümün qəm daşları", "Nəğmə çələngi", "Binə şəhidləri", "İntizar", "Dağlar oğlu", "Xatirələr" dediklərimizi təsdiq edir. Dörd şeirinə mahnı bəstələnib. Adil Zeynallı "Qızıl qələm" mükafatı laureatıdır.
Arzumuz budur ki, 85 yaşlı qocaman şairimiz bundan sonra da sağlam, mənalı, gümrah ömrünü yaşasın, qəlbindən sözün işığı əskilməsin!
Ağacəfər HƏSƏNLİ
Adil Zeynallı
Ali Baş Komandan
Nə yaxşı ki, sən varsan.
Bu dünyada, İlhamım.
Millətin başı üstə
İşıq paylayan şamım.
Çəkdin millət dərdini
Gecələr səhərəcən.
Bu yolları sən çəkdin
Kəndlərdən şəhərəcən.
Qəm çəkirsən bəlkə də
Sən hamının yerinə.
İgidliyin sığmayır
Bu günümüzün şeirinə.
Diz çökdürdün düşmənə
Ağlın cəsarətinlə,
Barışmadın heç vədə
Torpaq əsarətinlə.
Ata vəsiyyətini
Şərəflə çıxdın başa.
Şərəfli tarixində,
Şərəfli tarixində
Daim yaşayırsız qoşa.
Məhəbbət
Cahan zülmətə dönsə,
Yetər onun işığı.
Odur bu yer üzünə
Paylayan yaraşığı.
Bu çəmənlər, çiçəklər,
Məhəbbətdən su içir,
Onun səhralarından
Leyli, Məcnunlar keçir.
Anamızın südündən
Keçibdi canımıza,
Anamızın qanından
Keçibdir qanımıza.
İradəsi dəmirdir,
Dözüməcən, səbrəcən.
Dünyaya göz açandan
Bizimlədir qəbrəcən.
Qoy ürəyim səndə qalsın
Qoy ürəyim səndə qalsın,
Sənsiz onu neynəyirəm.
Vaxtsız ölən bu sevgiyə
Onu ehsan eyləyirəm.
Qoy vədəsiz otlar bitsin.
Bu sevginin qəbri üstə.
Arzuları qanad açsın
Ümidlərin səbri üstə.
Hardan gəlib, hara gedir? -
Heç bilmirəm gidi dünya.
Bir vaxt vardı yer də göy də
Bu sevginin idi dünya.
Bu sevginin yollarında
Gözətçidir gözüm yenə,
Müqəddəsdir İlahitək
Bu zirvədən çətin enə.
Bu sevgi ilə Günəş kimi,
Doğulaydı hər gün səhər.
Bir Məcnun da yaşayırdı,
Xəbərsizdir ondan şəhər.
Dünya
Elə uşaqlıqdan bir az bağırdım,
Haqqı-ədaləti kömək çağırdım.
Gördüm faydası yox, coşub bağırdım.
Özünü korluğa qoydu bu dünya.
Selləri apardı neçə yoranı,
Zalım ayırmadı yaxşı yamanı.
O dilə yanaşı qoydu samanı.
Özünü korluğa qoydu bu dünya.
Sevinci damladı qəhri uman.
Gözəllik üstündə pərdədir duman.
Axmaqdan nadandan yaxşılıq uman.
Hələ balıqçıdır, tordur bu dünya.
Ulduztək parlayıb sayraşan deyil,
Küsdürdün səninlə barışan deyil.
Heç kəsin işinə qarışan deyil.
Gah şirin, gah şəkər sözdür bu dünya.
© Müəllif hüquqları qorunur! Mətndən istifadə etdikdə istinad mütləqdir!
