Yeddi il ayrılığın
Yeddi il ayrılığın
balışımın içində,
başımın altında!..
Yeddi min ilməsi var
yeddi il ayrılığın;
hərəsi bir çeşnidə...
Yeddi il ayrılığın
yeddi siqaret kimi
Külqabımın içində!
"Yeddi gümbəz"də yatan
yeddi illik məzardır,
yeddi il ayrılığın,
üst-başını ot alıb...
Yeddi il ayrılığın
yeddi illik şərabtək
Dumanlıdır, dumandır;
Ayrılığın yamandır!..
Yeddi il ayrılığın
yeddi gün, yeddi saat,
Yeddi dəqiqə deyil.
Yeddi illik ömrümü
ot basıb, güvə yeyir;
Balışımın içində,
başımın altında!..
1970
Allah rizasına
Ayrılığın havasına
Düşdüm səfər sevdasına
Səfər etdim,
axır yetdim,
məhəbbətin məcrasına...
Ordan o yan görünməzdi,
"Həyat"-"ölüm" bilinməzdi.
Bu sevdanın qanadında
ölməyə də ərinməzdim...
Əyləndirdi bir qız məni,
Dilləndirdi "dilsiz" məni.
Bir od vurdu, alovlandım,
Yandırdı da külsüz məni.
Hey alışdım heysiz-heysiz,
Kefləndim də şərab-meysiz.
Sonra gördüm o qız yoxdu,
Dünya yasdı o mələksiz...
Ayrılığın havasına,
Yol gedirəm qarasına.
Düşdüm səfər sevdasına,
Yazın Allah rizasına...
1994
Hardasan
Başımda hay salan, qıy çəkən
küləklər,
Könlümü hey ələk-vələklər.
Bu işə mat qalıb fələklər,
Hardasan,
sevgili böcəyim,
adaxlım?
Səsin yox,
sözün yox,
özün yox,
Saçların yadımdan silinib,
kipriyin, gözün yox!
Mən dəli, gülməli
təkəm tək,
Təsəlli verən bir kəsim yox,
Hardasan,
sevgili böcəyim,
adaxlım?
Bu yanda vəlvələ,
o yanda zəlzələ,
Gəl tutaq illəri əl-ələ,
Mən dərddən uçulan Şamaxı,
Sən min il əvvəlki Qəbələ.
Hardasan,
sevgili böcəyim,
adaxlım?
1976
Ulu külək
Ulu külək,
Dəli külək,
İçi hirslə dolu külək,
Uca çinar boylu külək...
Kefi gəlsə
yarpaqları dilləndirər,
Bayraqları yelləndirər!..
Dəliləşsə
çəpərləri aşıb keçər,
ağacları qırıb tökər...
Yol gedəndə saymaz gedər,
Gəmiləri,
maşınları,
adamları qoymaz gedə...
Ona görə
külək adı çəkiləndə
dəniz coşub qəzəblənər,
acıqlanıb şirə dönər...
Ulu külək,
dəli külək,
İçi hirslə dolu külək
baxmaz sağa, baxmaz sola,
Başı lovlu düşər yola;
Çox görübdü zırpılar o,
hara gəldi çırpılar o.
Amma,
kiçik dalanlarda, qalalarda
başı kəsik toyuq kimi
çırpınar o...
Ulu külək,
dəli külək
İçi hirslə dolu külək
Bir kimsəni görməz gözü,
Göz açmağa qoymaz bizi...
1979
İnsanın bir zəif nöqtəsi haqqında
İnsanın bir zəif nöqtəsi varsa
o puldu!
Toxunsan o nöqtəyə
insan ölə bilər!
Pulsuz-parasızlar
quldu, quldu, quldu...
Qullar nə danışar, nə dinə bilər!...
İnsanın bir zəif nöqtəsi də var...
o yalandı!
Yalan söz ilandı,
gizli çalandı.
Baxma yalançılar yağ içindədir,
Bu miras
Adəmdən bizə qalandı!..
İnsanın bir zəif nöqtəsi də var...
o sevgidi!
Sevgisi qaldırar ərşə igidi
Sevgidən yüksəkdə tək Allah durur,
Allah tək sevgidi,
İnsan ikidi...
İnsanın bir zəif nöqtəsi də var...
o ölümdü!
Ölümsüz yaşayıb ölmək zülümdü...
Zülmətdən yol keçib gəlmişəm ki, mən
Sonrakı ömrümüz
səssiz filmdi...
1990
Məni dilləndirən
şairliyimdi
Biz bir cüt əkizi əksliklərin,
Məni dilləndirən şairliyimdi!
Aramızda çay var, dənizdən dərin,
Səni şullandıran acgözlüyündü!
Sən dollar düşgünü, sırf sərvət soran,
Mən yalxı ürəyə barmağın soran
Sən eyzən teyxa yağ,
mən eyzən şoran
Məni dilləndirən şairliyimdi,
Səni şullandıran acgözlüyündü.
Hər yerə pul kimi axırsan deyə,
Pulun arxasından baxırsan "göyə"
Göylər də mat qalıb hara söyləyə?!
Məni dilləndirən şairliyimdi,
Səni şullandıran acgözlüyündü!
Yallan, yallanan ol, mənsə aldanan
Şullanar it kimi ələ tullanan
Onunçun pullanır belə pullanan
Məni dilləndirən şairliyimdi,
Səni şullandıran acgözlüyündü!
Dünyadı, qanana dana böyüdür,
Deyirsən onu da ana böyüdür…
Qutsal anaları məna böyüdür
Məni dilləndirən şairliyimdi,
Səni şullandıran acgözlüyündü!
Sən kimsən? Qul! Kölə! Elədən belə,
Cılızsan, cındırsan, "cır-cıp"san, ölə!
Siçantək daşıyıb yığırsan çölə
Məni dilləndirən şairliyimdi,
Səni şullandıran acgözlüyündü!
17.10.2003
Bu gecə yarısında
Bu gecə yarısında
"Qu" desən qulaq batar,
sükut əriyir qulaqlarımda -
qışqırmaq istəyirəm...
Bu gecənin yarısı
İtin quduran çağı -
oturub tək, kimsəsiz
səhəri gözləyirəm...
Bu gecə yarısında
Gecədən sübhə kimi
yol gedən var halbuki...
Bu gecə yarısında
xəstəxanalar oyaq.
Gecələr bir sınaqmış
xəstə xəstəyə dayaq...
Bu gecə yarısında
ürəyi dayananlara heyif!
Bu gecə yarısında
oyananlara heyif!..
1979
Bayılda nəğmə
Bayılda
mənim də
bir gilə
payım var.
Bir o qız,
bir yağışlı gecə
Yadımdan çıxmayır indiyəcən...
Bayılda
bir axşam,
bir kərə
olmasan bayırda,
Sevməzsən Bayılı,
sevməzsən ayrıdan...
Yağışlar kəsəndə səsini,
Küçələr yuyanda əksini,
İşıqlar yağışdan üşüsə,
Yarpaqlar xəlvəti görüşsə,
Onda döz, döz onda kişisən!..
Bayılda ömrümün parçası,
Ömrümdə bir Bayıl bağçası
Gəzirəm, dözürəm - sözüm yox,
Dünyada heç yerdə gözüm yox,
Bayılı sevirəm;
Bayılda
yaşaya biləydim ayrıdan...
1974
Don Kixotlar
Oturanda
yuxarı başda oturardılar...
Danışanda
Məclisi otarardılar...
Yerli, ya yersiz öyünərdilər.
Bir oturar,
bir durar,
bir geyinərdilər...
Dedikləri kəlməyəcən,
aldıqları nəfəsəcən
mükafat gəzərdilər.
Bir sözlə, dostlarımız
o illərin
Don Kixotuna bənzərdilər...
1984
Rəsul Rza və Əli Kərim
Rəsul Rzanın böyük yaradıcılığı var,
Əli Kərimin - gözəl!
Rəsul Rzanı
Xəzərə bənzədərdim təlatümüylə,
Əli Kərimi Göy gölə,
sözməsəl!
1985
Dünya qəlizdi
Toğrulum otuz yaşındadı;
Cocuqluq havası amma
başındadı.
Gözü hələ də
kenquru torbasındadı.
Bunun günahı ya məndədi,
Ya
anasının şorbasındadı!..
Təbrizin
dili dilimdəndi,
eli elimdəndi.
Elə bilirəm amma
hansısa filmdəndi...
Dənizə də bel bağlama,
Bir gün elədi,
bir gün belə...
Xeyri yoxdu,
lap soyun gir bel-belə...
Nə boşaya bilirsən,
nə boşlaya bilirsən.
Əcəldi,
Cəncəldi,
Tələdi, tələ...
Toğruldu,
Təbrizdi,
Dənizdi...
Bunların işi
qadasını aldığım
Qarabağdan da qəlizdi...
2001
***
Taleyimin ipliyindən tutub
yatmışdım onda.
Siqaret kayfını da
atmışdım onda.
Ayıldım gördüm röyamdasan,
Röyadan da şirin sevdamdasan.
Qürbətdə qalan
səs olmuşuq indi,
Ayrılıqda yanan kəs olmuşuq...
Azərbaycan
(Nəğmə)
Azərbaycan, Azərbaycan
mətin torpağım,
Çoxum-azım,
alın yazım,
elim-oymağım!
Tarlaların
Əlvan paltar geyib əyninə,
Meşələrin
Yaşıl xalı sərib qoynuna.
Qoca Qafqaz
qol dolayıb sənin boynuna
Azərbaycan,
Azərbaycan,
mətin torpağım!
Çoxum-azım,
alın yazım,
elim-oymağım!
Anam dedim -
Anam səndə uyuyur indi,
Qalam dedim -
Oğlum səni qoruyur indi
Adın gəzib
ürəklərdə yeriyir indi
Azərbaycan,
Azərbaycan,
mətin torpağım!
Çoxum-azım,
alın yazım,
elim-oymağım!..
© Müəllif hüquqları qorunur! Mətndən istifadə etdikdə istinad mütləqdir!
