Səadət dalğası
Üzündə təbəssüm,
burnunda
yuyulmuş saçlarının ətri.
Geniş ekranın hər yerində Lui de Funes...
Güzgülər işıqlı, qapılar yüngül...
Gecələr yuxunda
portağal ətirli
dənizlər görürdün...
Masada anana aldığın peçenye.
Şirniyyat kağızları -
sevişdiyin qadının gecəliyi...
Əlkimya
Sobada yanan alov
dəmir çaydanı qızıla bənzədir.
Qəmgin insan
indiyə inanıb, gələcəyə ümid edir.
Neqativ - Pozitiv
Sən gölməçəyə atılmış gülün
taleyinə üzüldün,
mənsə gülümsədim - suya hopmuş
qoxunu düşünərək...
Balıq bilməsə də...
Bir qab su içində
bişmiş balıq dərisinin üzüntüsüdür, qüssən.
Xırda-xırda hissələr qopur, həll olurdu...
Nə vaxtsa böyük dünyan,
sonsuz yaddaşın vardı
amma indi ayaq altındakı
bir pulcuğu qorumağa bənzəyir
içindəki təmiz nəfəsi
itirməməyə çalışmaq.
Təbəssüm
Xoşbəxt idi
alma dilimləyən bıçaq.
Bu səhər
masadan dünyaya
gülən gözlərlə baxırdı.
Dördbir tərəfdən ətirlənmiş gənc kimi...
***
Badam ağacının
qara qabığıyla doğma idi qaranlıq;
az işıqlı otaqda
sən ağ gecəliyinlə uzanarkən.
Bir su kranının qoxusunu xatırladım...
İşıq
Şara üfürdüyün nəfəs
məmnundur
yeni bədənindən.
İşarə
Tanrının bizə baxmasını,
gülməsini xəyal edirəm -
qaşıq qazanın içində fırlanır
və sonra çıxır, ağzı südlə dolu...
Əsmər üçün
Yaşamın hər addımında
sənin dadını axtarmaq...
Bilirəm, qara daşlardan heç vaxt
ağ krem axmayacaq...
Amma sənin tamını axtarmaq
həyatdan imtina etmək,
əslində səni yeni həyat sanmaqdır.
Mən süfrəyə etina etməyib
yeməksiz boşqabı öpmək kimi,
sənin dadını axtarmaqla
bütün pis dadlara nifrət etdim.
Sən iri bir göbələyin kölgəsində
saçına vurduğun broşla...
Sən
əriyən buzun qulağına
təsəlli pıçıldayan sözlərinlə,
Sən
istidən bişən çayır üçün
suyu bəzəyən əllərinlə...
Sənin qadınlığın bütün dünya qarşısında -
qucaqlamaq,
ağlamamaq,
müqəddəs qalmaq üçünmü?..
***
Çox danışandan sonra
duyduğun utanc hissi...
Səsin bir torbaya atılıb
azdırılmış pişik kimi...
Sevgini xatırlayarkən
Sarı almanın çilləri kimi
minnətdar idik Tanrıya,
mövcud olmağımız
yerə səpilməyimiz üçün...
© Müəllif hüquqları qorunur! Mətndən istifadə etdikdə istinad mütləqdir!
