XX əsr italyan şeiri

 

Aldo Palasesski

(1885-1974)

 

Ana

- Oğlun yalan söyləyib, ana.

- O mənim oğlumdur.

- Oğlun yaman adamdır, ana.

- O mənim oğlumdur.

- Oğlun adam öldürüb, ana.

- O mənim oğlumdur.

- Oğlun tutulub, ana.

- O mənim oğlumdur.

- Oğlun dəli olub, ana.

- O mənim oğlumdur.

- Oğlun qaçıb, ana.

- O mənim oğlumdur.

- Oğlun ölüb, ana.

- O mənim oğlumdur.

 

 

Mariya Luiza Spasiani

(1922-2014)

 

***

Çox güman, evinizin üzərindən uçan

həmin quşdur

indi bizim artırmada

çörək qırıntılarını dimdikləyən.

O mənə səndən danışdı.

Səhəri necə qarşılamağından.

Sənin susqun ismarışını çatdırdı

Mənim pəncərəmə.

 

Mən bu elçi quşu tanıdım.

Sabahın qapıları

Düz mənə açıldı.

Özgə vaxt

Elçilər mələklər olardı.

Amma indi,

Hər şeyin lənətləndiyi vaxtda

Çörək dimdikləyən

Quş da pis deyil.

 

 

Tonino Querra

(1920-2012)

 

Təklik

Ana,

sənin oğlun tənhadır,

ağzında saman çöpü

divarın yanında

durubdu.

Birisi

vitrinlərin işığında

yağışın arasından

qaçaraq

addımlayır.

Ana,

sənin oğlun tənhadır,

boşluğa zillənib

solğun baxışı

və onun bu dünyada

heç kimlə

işi yoxdur.

 

 

Kremli kökə

 

Anama görə oxudum məktəbdə.

Məsələ beləydi ki, o, yazmağı bilmirdi.

imza yerinə eləcə xaç çəkirdi.

 

Çoxlu şəhərləri, dünyanı gəzdim,

yenə də anama görə, məsələ beləydi ki,

o öz kənddəki evindən

                        qırağa addım atmamışdı.

 

Dünən gəzməyə çıxdım,

kor anamı götürüb yaxındakı kafeyə getdim.

Sözə ehtiyac yoxdur,

                      indi hər şey gətirəcəkdilər,

hətta kremli kökə də.

 

 

 

Patrisiya Valduqa

(1953)

 

"Rekviyem" silsiləsindən

 

Eh, ata, ürəyimin atışı,

Çoxdandır ki, beləcə xəstəsən,

Gecələri və gündüzləri gəzirsən,

Sanki gizlənpaç oynayırsan

Sualtı qayıqla dəniz kimi.

Sanki hansısa ağlagəlməz filmdə

Öz dəli rəqsini edən görürəm -

Səni anlayanlar və görənlər üçün

Amma onlar üz tuta bilməzlər

Sənin hələ ki var olduğun dünyaya.

 

Tərcümələr Səlim Babullaoğlunundur


© Müəllif hüquqları qorunur! Mətndən istifadə etdikdə istinad mütləqdir!