Yenə qalxır kürsüyə
Təmkinlə, asta-asta.
Sağ əlini qaldırıb
Beş barmağın göstərir,
Söyləyir mahir usta:
- Dünya beşdən böyükdü.
Biz də varıq dünyada,
Kim bunu qəbul etmir
Özü dünyaya yükdü.
Kainata Günəştək
Doğulma anındayıq!
Zalımın qarşısında,
Məzlumun yanındayıq!
Salonlar uğuldayır,
Oturanlar titrəyir,
Biri qaşını dartır,
Biri gözünü əyir.
Özündən müştəbehlər
İçindən kəsilsə də,
Haqq qınından sıyrılır
Dərs olur naqislərə.
Dünyaya hökm edənlər
Haqqın önündə aciz.
"Dünyanın haqq sözünü
Dünyaya deyənik biz", -
Deyir Rəcəb Ərdoğan.
Ak dənizdə ruzigar
Əsdikcə acı-acı.
Quzey Kıprıs yavrutək
Bir sevginin möhtacı.
Bol olsa da ruzusu,
Ağzından tikəsini
Almaq istəyən də var.
Şəhidlərin qanıyla
Qazandığı haqqını
Beynəlxalq müstəvidə
Çalmaq istəyən də var.
Siyasi dəllalların,
Bu çinli oğruların
Qarşısında poladdan
Sipər olub dayanan
Rəcəb Tayyib Ərdoğan!
Şahə qalxır fırtına.
Dünyanın dörd yanından
Dəstək gəlir yunana.
Bir fransız gəmisi
Toplu-tüfəngli gəlir.
Makronun boğazında
Xırıldayır cır səsi,
Min cürə şər-şamata,
Min cürə rəngli gəlir.
Ləkə vurmaq istəyir,
Mərd ərənlər yurduna.
Böhtan atmaq istəyir
Ər oğlu Ərdoğana.
Xəbəri yox, nə bilsin,
Türkün gözəl sözü var;
"Meydan hünər meydanı,
Meydan ər meydanıdır".
İndi döyüş məqamı,
İndi zəfər anıdır.
Oyunçu olmaz ondan.
Baxıb gülür Ərdoğan!
Ahılla ahıl kimi,
Çocuqla çocuq kimi
Söhbətləşən, dərdləşən,
Qasırğalar önündə
Qaya kimi sərtləşən,
Dağ kimi dimdik duran,
Dağ kimi əzəmətli
Rəcəb Tayyib Ərdoğan!
Ürəyində nə vaxtdı
Qarabağ nisgili var.
"Qarabağ şikəstəsi"
Səsləndiyi o anlar
Düşünür dərin-dərin.
Xəyalından keçirib
Bu yurdun sərhədlərin
Deyir gərək tanınsın,
Nə düzdür, nə yalandır.
Qarabağ türk yurdudur,
Şuşa bizim məkandır.
Azərbaycan Türkiyə -
Türkiyə Azərbaycan!
Deyir Rəcəb Ərdoğan!
Aydınlıq güzgüsüdür
Bəşərə məhəbbətin.
Simvoluna çevrilib
Mərdliyin, mətanətin.
Azərbaycan sevdalı
Turan vətəndaşıdı.
Ali Baş Komandanım
İlham Heydər oğlunun
Dostudu, qardaşıdı
Rəcəb Tayyib Ərdoğan!
İstanbulda bir məkan -
Məkanın cənnət olsun.
İgid doğan, ər doğan,
Müqəddəs ruhlu ana!
Gözlərin aydın olsun
Bir oğul doğmusan ki,
Ər sultandır Turana!
Üzündə Ay işığı,
Gözlərindən nur yağan
Dünyanın tək lideri
Rəcəb Tayyib Ərdoğan!
© Müəllif hüquqları qorunur! Mətndən istifadə etdikdə istinad mütləqdir!
