Çağla Nurvəş
Çağla təxəllüsü ilə tanınan şair Əli Nurvəş 2002-ci il iyunun 17-də Təbriz şəhərində dünyaya göz açıb.
O, kiçik yaşlarından şeir və musiqiyə maraq göstərib. 14 yaşından şeir yazmağa və 16 yaşından qopuz musiqisini ustad Çingiz Mehdipurun qardaşı Fərrux Mehdipurun yanında öyrənməyə başlayıb.
Hazırda filologiya ixtisası üzrə təhsil alır. Şairlikdən əlavə, Təbriz şəhərində bir çevirmən kimi də tanınır. O, Musa Yaqubun, Əjdər Olun, professor Sədnik Paşa Pirsultanlının, Qurban Səidin ("Altunsaç" kitabı) və 16 ədəd uşaq kitabını nəşrə hazırlayıb.
Onun "Dəlilərin sevgisi" adlı romanı da Azərbaycanda və Şimali Makedoniyada Zeynep Hüseyin tərəfindən tərcümə olunmaqdadır. Roman tezliklə iki ölkədə çap olunacaq.
Gənc şairin bir neçə şeirini "Ədəbiyyat qəzeti"nin oxucularına təqdim edirik.
***
"T" hərfi,
Terroristlərin müharibə vaxtı
qurtarmış güllələri,
Amma qürurundan
qayıtmır geri.
"A" hərfi,
Ateistlərin üstünə küffarlıq
adını qoyan müsəlmanlar.
Dünyanın hər yerində,
Qurur kifircə divanlar...
"M" hərfi,
Mart ayının 29-da,
Nazim Hikmətin
Dustaqlıqda aclığa başlaması.
Robert Falkon Skottun
ailəsinin yası.
"A" hərfi,
Yenə "A" hərfi,
Bu hərf, Allahın müştərəksizliyini
yadıma salır.
Tanrı müqəddəs kitablarda,
Elə bil min hava çalır...
"Y" hərfi,
Kaş adının axırında,
Bu hərf olmayaydı.
Mənim də güllərim,
Susuzluğundan solmayaydı...
Axı bilmirəm ki,
Buna YAR deyim,
Ya ki,
Ahı-zar deyim.
"TAMAY" deyib,
Yenə də hər nəyi unuduram.
Eh...
Kaş bir də görüşəydik.
"Tarqova"nın küçələrində.
Kaş bir də görüşəydik,
Təbrizin,
Folklor dolu,
Musiqili gecələrində...
Sevgilim
Sevgilim,
Məni aramaq istəyirsənsə
Xiyabanlarda
Yetim uşağın əllərində
qırmızı gülün üstündə
yatan tozam.
Bilmirəm yaşamı
mən necə,
hara yozam?
Sevgilim,
Mən illərdir kitabxanalarda
Kitabların
Yuxuya keçmiş sətirləriyəm.
Gecə-gündüz
Çalışan fəhlələrin
alnındakı təriyəm.
Sevgilim,
Mən,
Mən çox yaxındayam
Məni uzaqlarda axtarma!..
***
Bu şairlər
millətin ətini yeyib, sümüyünə dayanıblar.
İlahi, belə də yalan olarmı?
Keçmişlərdə şairləri dabanından soyurdular,
indi isə
şairlər cəlladı dabanından soyurlar.
Ataların yaxşı bir aforizmcə sözü var:
"döyən qalır qıraqda, döyülən tutulur".
İlahi,
səndən bir diləyim var,
bu dünyaya şair göndərmə...
Uzaqdan bir səs gəlir,
Çox uzaqdan.
Bilmirəm yerin altından gəlir,
Ya ki,
Göyün qatlarından gəlir,
Ancaq bu səs
Yaman göyə yüksəlir.
O səs yaman incə səsdir
Ağlımı alıb məndən
O səs çatır qulağıma,
Dincəlirəm
Həzinliyindən onun.
Uzaqdan bir səs gəlir,
O səs mənə yaxınlaşır
O səs deyir:
Bu dünyaya,
Yenə də bir
yalançı şair gəlir.
Kül bu insanlığın axmaq başına.
Təqdim etdi: İntiqam Yaşar
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
