Uşaq şeirləri... - Sevinc Elsevər

 

Kirillə latını qarışdıranda

hər gün qutab alır

məktəbdən Nunu

yarısını yeyir

yarısını yemir

evə gətirir vərəq arasında

vərəqi açıb

baxır anası

kiril əlifbasıyla olan

hansı kitabdandı düşünüb tapır

hansı fənndi

neçənci sinif

hansı bölmə

hansı fəsil

neçə almışdı həmin dərsdən

müəlliminin adı nəydi?

Nunu yarımçıq qutabları daşıyır qəsdən

anasının xatirələrini öyrənir

 

bəzən dalbadal çıxır vərəqlər

tutuşdurmaq

bir neçə səhifə ard-arda oxumaq olur

bu olur əsil əyləncə

kiril əlifbasını öyrənib Nunu

daha oxuya bilir

anası yazı yazanda

latınla kirili qarışdıranda...

İki yalan

üçüncü balıq  ölürdü

akvariumda

ata onları oğrun-oğrun götürürdü

amma balıqları adbaad tanıyırdı

balaca Elçin

əzbər bilirdi hansının rəngi necədi

birinin quyruğu qəşəngdi

birinin üzgəci

balıq vardı başında qıpqırmızı papağı

balıq vardı yupyumruydu dodağı

vardı uzunburunu

yumrubaşı

hərəsi bir təhərdi

Elçin hamısını sevərdi.

 

bir gün yoxa çıxdı albinoslardan biri

o biri gün qırmızıpapaq

bir gün də irigöz olanı

Elçin gördü atası

hərəkətsiz balığı ovcuna aldı

aparıb həyətə

ağacın dibinə atdı...

doluxsundu

kəsdi atasının qabağını

soruşdu niyə atdın balığımı?

 

- Təzə balıq alacam

o balıq doğruçu deyildi

daşı qurtarmışdı

görürsən, hərəkət eləmirdi...

- Bəs bunlar doğruçudu?" -

akvariumu göstərib

soruşdu Elçin

ata bilmədi nə desin

"doğruçudu" söylədi

səhəri gün

ata akvariumdan bir balıq da götürdü

Elçin bunu da gördü

 

yalan danışdığını boynuna aldı ata

dodağını büzdü  Elçin:

-Bəs mən iki alanda,

sonra onu pozub yerinə beş yazanda

"yalan demək pis hərəkətdi " demişdin

özün niyə yalan danışdın?

 

ana qarışdı sözə:

- Canım, gözüm

iki yalan arasında fərq var

atan yalan danışdı

səni üzməmək üçün...

 

Elçin burnunu çəkdi:

- Mən də iki aldığımı sizə görə demədim

nə vaxt ki  beş alıram

üzünüz gülür sizin

nə vaxt ki  iki alsam

kədər qonur gözünüzə

bir söz demək olmur sizə

beş aldım oluram yaxşı

iki alsam pis oğlan

əgər siz qəmlənməsəz

mən də yalan danışmaram

 

on balıqdan qalanda cəmi ikicə balıq

ata dərman alıb gətirdi

akvariumun suyunu da dəyişdi

sonra dərmanı səpdi

iki balıq sağ qaldı

kağıza yazılmasa da

ata Elçindən "iki" aldı...

© Müəllif hüquqları qorunur! Mətndən istifadə etdikdə istinad mütləqdir!

 


© Müəllif hüquqları qorunur! Mətndən istifadə etdikdə istinad mütləqdir!