Günlərdən cümə axşamı, aç bağladığın qapıları, Tanrım! - Həyat ŞƏMİ - şeirlər

Pandemiya dövrünün şeirləri

 

#EvdeQal

Bu gündən evdə qal,

günlərdən cümə...

Aç gözlərini,

oxu kitabları,

aç cümlələri!

O gəldi ki,

cümləmizin başına gələnləri görəsən -

indi mübtədamız o (koronavirus),

xəbərimiz də o.

Ölən var,

qalan var,

Sən də evdə qal!

 

Günlərdən şənbə...

Özünü və gözünü götür evdən düşəndə,

Eynəyini tax, amma gözüaçıq ol,

Maskanı gey,

əlcəyini gey,

telefona bax,

məsafə saxla məsafə tanımayan insanlarla...

Vaxtın bitdimi geri dönəcəksən onsuz da,

evdə qal!

 

Günlərdən bazar...

Evdə qal və tanı

Covid-19 adlı azar dolaşır dünyanı...

Sən elə bilirdin ki,

yalnız ətli-qanlı olur düşmən,

canlı olur düşmən?

Cəsədləri gördünmü, evdə qal!

 

Hazırlaş, günlərdən bazar ertəsi:

Ölən var,  infarktdan, amma,

dönən var -

Çıxır evdə qalmaq yaraşmayan acların səsi...

- Evdə qal,

sənə də düşəcək,

Tanrının yardım tikəsi.

 

Günlərdən ikinci gün -

çərşənbə axşamı,

Karantində beşinci,

Siz heç belə bir tonqallı gün gördünüzmü?!

Hardasa uzaqlarda yandırılır cəsədlər,

bağlanıb sərhədlər,

evdə qal!

 

Günlərdən çərşənbə,

Bir film izlə tarixi,

tarixi izlə,

xəbərdən aralan,

ondan uzaq dur!

bir muzeyi səyahət et virtual,

Evdə qal!

 

Günlərdən cümə axşamı,

Aç bağladığın qapıları, Tanrım!

Səndən uzaq qalanlara

bir məktub yazdır,

qara düymələr üzərində

bəyaz

barmaqlarla:  #evdeqal

#nigaran qalma,

#ürəyimdəsən...

#ölümsüz bir sevda qal,

Tanrım!

12.04.2020

Karantində qal indi

Yenə könlümə düşdün,

Varmı başqa yol indi?

Qəlbimin köşəsində

Karantində qal indi!

 

Gecə-gündüz darıxma,

Sənə nə fərq edər ki!

Getmisən, yerdə qalan

Sənsizlik o qədər ki!

 

Hava gözəl, ağaclar

Çiçəklərlə bəzənir,

Yenə havalı gəl ki,

Əfv edə bilim səni.

 

Tanrının istədiyi

Olurmuş əvvəl-axır...

Elə bil Yer üzü də

Sənin üçün darıxır.

 

Çıxarıram yadımdan

Adını baş hərfiylə,

Sənə məktub yazmışam

Dolub zaman zərfiylə.

15.04.2020

 

Koronaviruslu Bakım

Diyar-diyar gəzdi

bəxtiyar insanlar və şəhərlər arasında,

Sənə də qıydı, Bakım!

 

Küçələrini yudu-sərdi Günəşə,

Balkonlarda asıldı insanlar,

çəkildi adamlar,

ağır gəldi zaman...

Küçələr quşların, otların,

daşların oldu.

Boğazından tutduğunu

atdı atəşə...

 

Nə gəldi sənə, Bakım!

üzüldün içindən,

sənə gələn mənə də gəldi,

özü də Çindən...

 

Daha gendən dur, oxucum!

Səsimdən öpmə,

hərflərə toxunma,

oxuma bu şeiri, oxuma!

Sənə də keçər...

Keçər, Bakım, keçər!..

17.04.2020

© Müəllif hüquqları qorunur! Mətndən istifadə etdikdə istinad mütləqdir!