Qorxardın bu sevgidən, getməyi də bilməyən, qalmağı da bilməyən... - Gülsadə İbrahimli - şeirlər

 

Sənin kimi sevilmək

Kim bilir, kimlərin bilmədiyisən indi

Ciyarını bildiyim.

üşüngən əllərini,

sərsəmlədici gülüşünü dibinədək sevdiyim.

Şərabı dodağından ölümü dadmaq vardı,

vardı, əlbət, bilirəm

bilmədiyin nələrin.

İndi hardasan, görən,

Hansı axmaq qadının

            dadsız-duzsuz yeməyinin tərifini deyirsən.

Yəqin, bir başıboşun gülüşünü sevirsən.

Qorxardın bu sevgidən, getməyi də bilməyən,

qalmağı da bilməyən...

Get, yaşa həyatını bir sadəlövh qadınla.

Mənim dənizimin fırtınası sərt olar.

Qaç, qurtar səni məndən; sənin kimi sevilmək

Bir gün sənə dərd olar.

 

"Mən"cil

Soyun üstünü, gəl.

Gəl, deyəcəklərim var sənə səndən.

Yer üzünə gəlmiş ilk aşiqlər bizik.

Təzələ Adəmin günahın,

Qarşı çıxaq bütün "olmaz"lara.

Rəqs etmək istəyirəm, sevgilim,

Sar qollarını belimə,

..."in my secret life..." ah Leonard Cohen...

Tutkunun adamı...

Dolur otaqlarıma musiqi səsi,

rəqs edək, sevgilim.

Dönsün başım üstə ulduzlar.

Dodaqların sehrin özü.

Əllərin necə qəddardı,

nə qədər ölümcüldü və necə nəzakətli.

Şərab süz,

sərxoş olmaq istəyim var.

Gözlərin intiharın çağırdığı yer.

Öp mələklərimin qanadından,

Öpməsən, keçməz,

tərbiyə olmaz bu gecə bətnimi ağrıdan məncil istək.

 

Eyni ayrılığın frekansı

Gedənlər bilirmi geridə qalanların hər nəfəsdə öldüyünü?

Eyni ayrılığın frekansında

daha neçə mahnıyla asacağıq xəyallarımızı?

Ən son öpdüyün yerdən ağrıyıram

Hər dəfə əllərim toxunanda çiyinlərimə.

 

Əbəs

Sənin saatlarının taleyində mən yoxam,

Gözləmələrin yersiz,

Gəlmək istəyim əbəs.

Biz Bakının təcrübəsiz aşiqləriydik,

                        qağayı dimdiyindən düşüb,

balıq yeminə dönən.

Şəhər oğrusuydu zaman, bizi bizdən almağı yaxşı bilirdi.

Saf kənd uşağıydıq ikimiz də,

Bakı çirkabıyla bizi sevirdi.

Əllərimizdə məhəbbət izi,

                        ürəyimizdə öpüş yeri gəzdirdik.

Saçlarım barmaqlarında ölmüşdü.

Bir hərb vermişdik qovuşanadək və o gecə

Şəhərin bütün işıqları sönmüşdü.

Hərdən olurmu?..

Hərdən olurmu ki, bir gecəyarı

Sənin də səbəbsiz canın sıxılsın?

Üşüsün əllərin əllərim üçün,

Sağ yanın darıxsın, solun darıxsın.

 

Təsəlli etməsin dostlar, tanışlar

Qaçıb "hamılardan" təkcə qalasan.

Siqaret üstünə siqaret çəkib,

bütün vidaların canın alasan.

 

Söylə, dağ qoxulum, mamır ətirlim,

bir dənə tel üçün əsibmi könlün?

Bir baxış, bir nəfəs, bir gülüş üçün

Gecənin çiynində gedibmi ölün?!

© Müəllif hüquqları qorunur! Mətndən istifadə etdikdə istinad mütləqdir!

 


© Müəllif hüquqları qorunur! Mətndən istifadə etdikdə istinad mütləqdir!