İki səs
Divardan asılmış tüfəng
çoxdan deyil,
azdan küsmüşdü deyə
sükutu
zirzəmidə toz basmış
bir pianonun dilləri
güllələdi.
İki səs!
Siyah və bəyaz!
Sözlər ətrafa sıçradı,
göy
üzü,
biz
belə
danışmamışdıq...
Daş qucaqlarım
Nə gecə bildiniz,
nə də ki, gündüz.
Halbuki, istəsəniz
gedə bilərdiniz.
Yaxınlar gecikəndə
uzaqlar kimi
bir kənara söykənib
sahil səbri ilə
məni gözlədiniz.
Mənim divar qucaqlarım,
daş qucaqlarım,
yoxsa
çiçəkləməzdi bu ağac indi...
.jpg)
Köpük sevinci
Mənim babam firon olmayıb,
heç piramidalarda belə, əməyi yoxdur,
bir qul kimi...
Yəni mənə xəritədən tanışdır Misir.
Saçlarını həmişə ovuclayanda
qulağına Nil deyə pıçıldayardım.
Sən də gülüşlər rəngini itirməməyi
gecələrdən öyrəndi deyərdin.
Mənsə Tanrını bir də vətəni sevməyi
uşaqlar qarşısında
yıxılmağa bənzədərdim.
Səhər açılanda isə
onlar kürülərdə
bizsə köpüklərdə
balıqların gülüşünü sevərdik.
Bir boşluq dartır əlimizi
Özümüzə keçməmiş
zamandan-zamana keçmək istəyirik
xoşbəxt olmaq eşqiylə.
Bəzən bacarırıq,
bəzən də məsafələr aldadır bizi
bir boşluq dartır əlimizi.
Sonra uzaqlaşan səsimizlə sürüyür izimizi.
Bax belə,
ölümdən uzaqlarda
izsiz-soraqsız adamlar doğulur,
heç vaxt ölməyəcək adamlar...
Tanımadığın dildə qocalmaq
- Salam, necə qocalırsan?
- Salam!
Bəzən sual, bəzən də
cavab-cavab qocalıram.
Bax bu sıxdığın əllərin sonu kimi
dırnaq-dırnaq qocalıram.
Eynəksiz köşələrdə varaq-varaq,
çörəyə sarılaraq qocalıram.
Gecələr xəyal dənizində qasırğayla,
gündüzlər ümid "peş"ində
aşiq düşüb qocalıram.
Yan otaqda uyuyan körpə təki
qədəhlərin səsinə diksinərək
qurtum-qurtum qocalıram.
Dünən xoşlamadığım südlə,
bu günsə tüstüylə qocalıram.
Kürəyi seçən ox, yayı da özüylə apardı.
Kimsəsiz sahildə
payız-payız qocalıram.
Bütün sükutlarım durnanı sevdi
Boş qalmış evdə
tanımadığım bir dildə qocalıram.
Küçələr, döngələr bitib
indi şəhər-şəhər,
ölkə-ölkə qocalıram.
Belə də, bildiyin və
bilmədiyin kimi...
Bəs sən
necə, qocalırsan?
- ...
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
