.jpg)
Qaranlıqda hələ də uşaqdı güzgüdəki
küləkdə yanan bir şamın işığı,
Titrəyirdi divarlarda.
qaranlıq pyesində,
İşıq rolunu oynamaqdan yoruldum...
Dialoqlarım ağappaq,
Monoloqlarım - tənhalıq.
Birinci pərdə
Doğur günəş bir qadının saçlarında...
Uzanır günlərim,
çoxalır iztirab.
Ona sarı öpüş jesti tuturam
Mimikalarında həyəcan...
Doğulanda yarı kölgə idim, yarı adam.
Vurdurdular kölgəmi,
tək qaldı adamlığım...
...Ciblərimin deşiyindən boy atır ağaclar
Ciblərimin deşiyindən zirvəli dağlar.
Hərdən tragediya -
Hərdən qəhrəmanlar susar ciblərimin deşiyində...
İkinci pərdə
...Böyüyür güzgüdəki
Böyüyürəm baxdıqca sənə.
Boy atıram gözlərinin meşələrində...
Sonra
odun oluram əllərinin ocağına
Sonrası isə bir udum yalan!..
Saçların səhərə bir saat qalmış
alatoran rəngində,
gözlərin gecəyə bir saat işləmiş
qaranlıq rəngində!
Əllərin pambıqdandır...
Külək aparmasın deyə, tapşır mənə.
Uçmaqdan öncə qanad ol ki,
qanım dilini...
Mən - dil olacaq qədər diri!
Mən - səs olacaq qədər söz!
Üçüncü pərdə
Yalqızlığın fraqmenti...
Əlləri ovuclarıyla küsülü,
gözləri giləsindən boşanmış,
qucağı tərk edilmiş,
Qolları - xaraba!..
...Saatlar yürüməz buralarda
Saniyələrlə davamız var hələ də.
...Yağışın ilk damcısından doğulan kəs
sel oldu mənə!
Köksümdəki kəndlərin evini yıxdı,
boğuldu keçmiş,
batdı gələcək...
Dördüncü pərdə
Mən sənsiz,
təyyarə də qanadsız - kimsəsiz!
...Qalsın quş,
qalsın qəfəs,
qalsın nələr... nələr!..
Yaxın dur tənimdəki ağaclara...
Sərçələrin izlərini al, götür,
al, götür qanadların çırpıntısını.
Yaxın dur!
Götür bu əlləri bədənimdən,
apar bu səsi boğazımdan...
...Şəfəqlərin sonsuzluğundan başlar baxışların
Dodaqlarının şəfqətindən.
Kölgəndən doğulur qağayılar,
kölgəndə kül olur qayğılar.
Beşinci pərdə
Bizim adımız qəbirdir tarix məzarlığında...
Bir ovuc buğdadır gülüşlərin
Güldükcə sünbüllənir sinəmdəki düz.
Düzünü desəm:
Payızdan bircə yarpaq da qalmadı...
Fəsilləri ud getsin!
At getsin bu yazıları...
Elə-belə yazdım ki:
Sevirəm səni
Elə-belə yazdım ki:
Dodaqlarındı Tanrı,
öp, yaranım yenidən...
...Danış damcı-damcı bardağıma
Səsin yüz faizli spirtdir
İçirəm səsini hər axşam.
Həminki ac adamam,
ey gözləri çörək!
Altıncı pərdə
Gördüm göz yaşlarımı küçənin tinində...
Ağrılarımın dodağında siqaret,
qəpiklərimin cobları deşik.
...Özüm boyda bir oğlan uşağı gördüm
Küçənin tinində durmuş!
Qurşunun qulağına
"öldürmək" feilini pıçıldayırdı hava.
...Alnım mərmiyə tamarzı.
Hava "əsmək" sözünü,
Mən isə yağışı şərab rəngində sevirdim...
Yeddinci pərdə
...Sus bir azca da!
Qarşımda güzgü
Darıxmaqlarımın saçlarını darayıram...
Ölür güzgüdəki...
İşıq obrazı sönür kəlmə-kəlmə,
sevinir gecələr sətirlər üstə,
qaranlıq qar olur
yağır kül kimi cənazəm üstə!..
© Müəllif hüquqları qorunur! Mətndən istifadə etdikdə istinad mütləqdir!
© Müəllif hüquqları qorunur! Mətndən istifadə etdikdə istinad mütləqdir!
