Mənə bir şərqi söylə...Şairlərin ən çox sevdikləri sevgi şeirləri... - Turqut UYAR - Dilsuzun təqdimatında

Bir gün səhər-səhər...

Gültən Akının ən çox sevdiyi sevgi şeiri

Bir gün

səhər-səhər

qapını döysəm,

yuxudan oyandırsam səni:

ki, daha sis qalxmamışdır

Xaliçdən,

gəmilər fit çalmaqdadır,

ətraf alacaqaranlıqdır,

körpü açıqdır hələ...

Bir gün

səhər-səhər

qapını döysəm,

yuxudan oyandırsam səni...

Bu dəfə

yolçuluğum

uzun çəkdi

olduqca,

gecə

dəmir körpülərdən

keçdi qatar...

Dağların başında

beş-on evli kəndlər,

yolboyu

teleqraf dirəkləri -

biz gedirik - gedirlər,

biz dururuq - dururlar...

Türkülər

zümzümə etmişəm

pəncərədən,

ya da,

uzaqlara baxıb,

xəyallara dalmışam.

Bileti

ümumi vaqona almışam -

kasıblığın üzü qara olsun...

Zümrüd gərdanlığa

gücüm çatmadı,

sənə

Sapancadan

bir səbət

alma aldım...

Ver əlini

Heydərpaşa vağzalı

dedim,

budur,

gəmi artıq limandadır,

pırıl-pırıl.

Hava yüngülcə soyuqdu.

Dəniz

qətran və

balıq qoxusu verir,

körpüdən

qayıqla çıxdım sahilə,

birnəfəsə qalxdım

sizin dikdiri...

Bir gün

səhər-səhər

qapını döysəm,

yuxulu səsinlə:

- Kimdir? - desən...

Saçların dağınıq...

Kim bilir,

nə gözəl görünürsən...

Bir gün

səhər-səhər

qapını döysəm,

yuxudan oyandırsam səni:

ki,

daha sis qalxmamışdır

Xaliçdən,

fabrikalar fit çalmaqdadır...

Cüyürlü gecə...

Kaan Murad Yanıkın ən çox sevdiyi şeir

Halbuki

qorxulacaq heç bir şey

yoxdu ortada -

hər şey

sünii və saxtadı, vəssalam.

Və

ölüncə -

beş, on, min kişi -

birdən ölürdük,

gün doğhadoğda,

amma

cüyürlü gecəni

bulmadan öncə.

Hamımız

uşaq kimi qorxurduq.

Bəzən gizlədə-gizlədə,

bəzən döyüşə-döyüşə

qoruyurduq

cüyürlü gecəni

böyük şəhərlərdən,

qladiatorlardan,

dişləri olan hər şeydən...

Bəli,

kimsəsiz idik,

amma

ümidsiz deyildik.

Harda

üç ev görsək,

bir səhər sanardıq,

harda

üç göyərçin görsək,

Meksika gələrdi ağlımıza.

Axşamüstü

caddələrdə gəzməkdən

xoşlanardıq,

sonra

şərab içərdik,

qırmızı, yaxud bəyaz,

cüyürlü gecənin üzündən...

"Cüyürlü gecənin

arxa yanı ağaclıq,

ayağının

suya dəydiyi yerdə

göyüzü,

çatal buynuzlarında

soyuq Ay işığı..."

İstər-istəməz,

eşqi xatırladır.

Əskidən

gözəl qadınlar

və

gözəl eşqlər olmuş,

indi də var, sözsüz.

Bir bilsəniz

necə sevinirəm

düşündükcə

cüyürlü gecələrin ən gözəlini...

Heç nə

gözümdə deyil,

eşqdən və ümiddən başqa.

Bir anda

xəyalımda

iki qədəh,

iki yeni türkü

və

cüyürlü gecə,

tükləri hamar-hamar,

tükləri yumşaq-yumşaq...

Nə vardısa,

cüyürlü gecədə idi,

ovuclarımızın

içi tərləyərdi

həyəcandan,

bir də baxırdıq

axşam düşüb:

səkilərə,

neon lampalarına,

çılpaq qadın çiyinlərinə, -

büllur otellərin önündə

qəribsəyirdik,

sanmayın ki,

böyük şeylərə görə

kədərlənərdik -

məsələn,

üç bakal

şərab içsək,

qüssədən qurtulardıq,

yaxud

bir adam bıçaqlamaq,

yaxud

küçələri zibilləmək,

amma,

ən yaxşısı,

çıxıb getməkdi,

çıxıb gedərdik

cüyürlü gecədə uyumağa...

Bədri Rəhmi ƏYYUBOĞLU

Çaxmaq daşı

Nərmin Yıldırımın ən çox sevdiyi sevgi şeiri

Səni düşünərkən

bir

çaxmaq daşı

isinir içimdə,

bir quş

gəlib qonur

ürəyimin ucuna,

bir lalə açılır qəflətən,

bir lalə

sinsi-sinsi qanayır...

Səni düşünərkən

bir ərik ağacı

təpədən-dırnağa

çiçək açır

və

sevdalılar kimi

fır-fır fırlanır

qarşımda,

fırlandıqca,

çərdəyi

təzə-təzə

süd bağlamış

gömgöy meyvəsinin

dadı qalır damağımda

və

dodağım od tutub yanır...

Səni düşünərkən

bir

çaxmaq daşı

isinir içimdə,

bir quş

gəlib qonur

ürəyimin ucuna,

bir lalə açılır qəflətən,

bir lalə

sinsi-sinsi qanayır...

Ümid Yaşar OĞUZCAN

Mənə bir şərqi söylə

Camal Sürəyyanın ən çox sevdiyi sevgi şeiri

Səsindən ötrü qəribsədim,

nə olar, danış -

bir gül açsın

keçmişin bağrında!

Zülmət içindəyəm,

qapqara qaralmışam,

gəl,

bu gün gəl,

göy mavisindən,

dəniz mavisindən

mənə bir şərqi söylə!

İçimdə

bir şey qımıldanır,

yorğunam,

yuxusuzam -

gözlərim qan çanağı,

baxsana

nə haldayam -

dəli-divanə...

Həm yaralı,

həm çarəsiz,

həm ümidsizəm,

mənə bir şərqi söylə.

Yağış ol - yağ üstümə,

günəş ol - isit,

yar qaranlığı işıqlar kimi,

al,

götür məni uzaqlara,

lap uzaqlara,

səsin

axsın içimdən

irmaqlar kimi!

Mənə bir şərqi söylə -

bir-birinə qat

bütün rəngləri,

içindən

buram-buram

bir turuncu gətir,

ötən yazdan.

səsin

axsın içimdən

irmaqlar kimi!

Mənə bir şərqi söylə -

astadan,

ağappaq səslə,

qar

necə həzin-həzin yağarsa,

elə.

Budur,

zülmət içindəyəm,

qapqara qaralmışam

halım ağlamalı,

gəl,

indi gəl,

hüzünlü səsinlə

mənə bir şərqi söylə...

Sezai KARAKOÇ

Mona Rosa

Ali Lidarın ən çox sevdiyi sevgi şeiri

Mona Rosa, siyah güllər, ağ güllər.

Geyvənin gülləri və bəyaz yataq.

Qanadı qırıq quş mərhəmət istər.

Ah, sənin üzündən qana batacaq,

Mona Rosa, siyah güllər, ağ güllər.

Gecə Aya hürər axmaq köpəklər,

Ürkək-ürkək baxar dovşanlar dağa.

Mona Rosa,

bu gün məndə bir özgə hal var,

Yağış iri-iri düşər torpağa,

Durmaz, Aya hürər axmaq köpəklər.

Açma pəncərəni, pərdələri çək,

Mona Rosa, səni görməməliyəm.

Bir baxışın ölməm üçün yetəcək.

Anla, Mona Rosa mən bir dəliyəm,

Açma pəncərəni, pərdələri çək.

O zeytun ağacı, söyüt kölgəsi

Məndəcə çıxarlar gün işığına.

Bir nişan üzüyü, bir qapı səsi

Səni xatırladır hər zaman mənə

O zeytun ağacı, söyüt kölgəsi.

Zambaqlar ən səssiz yerlərdə açar,

Hər yabanı güldə taparsan qürur.

Bir şamın ardında gözləyən rüzgar

İşıqsız qəlbimi titrədib durur,

Zambaqlar ən səssiz yerlərdə açar...

Zaman nə də tezcə keçirmiş, Mona,

Saat on ikidir, söndü işıqlar.

Uyu ki, durnalar girsin röyana,

Baxma tuhaf-tuhaf göyə bu qədər,

Zaman nə də tezcə keçirmiş, Mona.

Hər axşam gələndə əncir quşları

Daraşırlar bağın meyvələrinə.

Birinin rəngi ağ, birinin sarı

Ah, məni vursunlar o quş yerinə,

Hər axşam gələndə əncir quşları.

İnan, Mona Rosa, tapıram səni

Əncir quşlarının baxışlarında.

Gəl, həyatla doldur bu süst yelkəni.

Üzdüyüm dənizin göy sularında

İnan, Mona Rosa, tapıram səni.

Artıq inan mənə, qəriban qızı,

Dinlə və qəbul et etirafımı.

Bir soyuq, bir mavi, bir qərib sızı

Alov-alov sardı cümlə canımı,

Artıq inan mənə, qəriban qızı.

Mona Rosa, siyah güllər, ağ güllər.

Geyvənin gülləri və bəyaz yataq.

Qanadı qırıq quş mərhəmət istər.

Ah, sənin üzündən qana batacaq,

Mona Rosa, siyah güllər, ağ güllər.

Camal SÜRƏYYA

Eşq

Ece Təməlqızının ən çox sevdiyi sevgi şeiri

İndi sən qalxıb gedəcəksən.

Get.

Gözlərin qalacaqmı?

Onlar da gedəcəklər.

Getsinlər.

Halbuki

bilirsən

mən sənin gözlərinsiz

yaşaya bilmərəm...

Bir olan

Allah şahiddi ki,

yuxudan pis durmamışdıq -

xoşbəxt idik,

eşq daşırdı gözlərimizdən.

Bir quş

qonmuşdu barmaqlarıma,

uzun-uzun türkü söyləmişdi,

bir eşq gəlmişdi

və

bir daha getməmişdi,

qeyb olmuşdu

dünənki,

srağagünkü

yoxsulluğumuz,

sanki heç olmamış kimi...

İndi sən qalxıb gedəcəksən

Get.

Gözlərin qalacaqmı?

Onlar da gedəcəklər.

Getsinlər

Halbuki

bilirsən

mən sənin gözlərinsiz

yaşaya bilmərəm...

İndi

açsam pəncərəni,

gözləsəm,

sən gəlsən,

heç bir şey soruşmasam,

heç bir şey söyləməsəm,

sussam,

sussan,

sussaq.

Sükutun anlatdıqlarını

dinləsək,

arxa-arxaya otursaq,

hönkür-hönkür ağlasaq,

soruşmasaq bir-birimizdən

səbəbini,

sarılsam,

sarılsan,

sarılsaq.

Və

yenə heç nə danışmasaq,

amma anlasaq,

nə vardı yəni,

olsa,

nə olardı yəni,

xəyal-məyal,

xəyal-məyal...

Can YÜÇƏL

Hər şey səndə gizli

Şükri Erbaşın ən çox sevdiyi şeir

Yer səni çəkdiyi qədər ağır,

Qanadların çırpındığı qədər

xəfifsən...

Nəbzin vurduğu qədər canlı,

Gözlərin

uzağı gördüyü qədər

gəncsən...

Xoşladıqların qədər

zərif,

incə,

Nifrət etdiklərin qədər kobudsan.

Nə rəng olursa-olsun

qaşın, gözün,

Qarşındakının gördüyüdür rəngin.

Yaşadıqlarını qazanc sayma,

Yaşadığın qədər yaxınsan sonuna...

Nə qədər yaşayırsan yaşa,

Sevgin qədərdir ömrün.

Gülə bildiyin qədər xoşbəxtsən,

Üzülmə,

bil ki,

ağladığın qədər güləcəksən.

Sevdiyin qədər seviləcəksən,

Günəşin doğuşundadır

təbiətin sənə verdiyi dəyər.

Və

qarşındakına

dəyər verdiyin qədər

insansan.

Bir gün

yalan söyləyəcəksənsə əgər,

Qoy qarşındakı

sənə qüvəndiyi qədər

inansın.

Ay işığındadır

sevgiliyə duyulan həsrət,

Və

sevdiyinə həsrət qaldığın qədər

yaxınsan.

Unutma,

yağışın yağdığı qədər islaq,

Günəşin isitdiyi qədər istisən.

Özünü yalnız hiss etdiyin

qədər yalnızsan,

Və

güclü hiss etdiyin qədər güclü.

Və

budur həyat!

Bunu

unutduğun zaman

aldığın hər nəfəs qədər

üşüyərsən,

Çiçək sulandığı qədər gözəl,

Quşlar oxuduqları qədər sevimli,

Uşaq ağladığı qədər uşaqdır!

Və

hər şeyi

öyrəndiyin qədər bilərsən,

onda,

sevgilim, bunu da öyrən:

sevdiyin qədər sevilərsən...

Behcet Kamal ÇAĞLAR

İstəyirəm

Əhməd Arifin ən çox sevdiyi sevgi şeiri

Bir çiçək istəyirəm

Mən baxmadan solası,

Bir qanad istəyirəm

Məni yerdən alası,

Bir günəş istəyirəm

Gecə məndə qalası.

Bir mərmər istəyirəm

Arzumca oymaq üçün,

Bir qadın istəyirəm

Ruhunu soymaq üçün

Bir cüt diz istəyirəm

Başımı qoymaq üçün.

Biz zəncir istəyirəm

Hirsimi bağlayacaq.

Bir yanğın istəyirəm

Ruhumu dağlayacaq,

Bir ana istəyirəm

Üstümdə ağlayacaq.

Bir alınmaz qalanı

Fəth etmək təkbaşına,

Vurulub düşmək birdən

Son bürcün son daşına,

Uzanan bir cüt dodaq

Gözlərimin yaşına.

Bir ilham istəyirəm

Bir gün vəhyə erəcək,

Bir cüt göz istəyirəm

Can evimi görəcək,

Bir sevgi istəyirəm

Ömürlərcə sürəcək...

Bir mehrab istəyirəm

Önündə diz çökməyə,

Bir az yer istəyirəm

Yazda fidan əkməyə,

Bir toxum istəyirəm

Boş tarlanı əkməyə.

Bir bina, təməlinə

Əlimlə daş qoyacaq,

Bir sevgili, hər dərdin

Gözünə yaş qoyacaq,

Bir iman istəyirəm

Uğrunda baş qoyacaq...

Tərcümə etdi: Dilsuz