Hələ tanımırsan bu adamları... böyüyə-böyüyə tanıyacaqsan... - Xatirə FƏRƏCLİ - ŞEİRLƏR

 

Dəli bir istək var canımda indi,

Baş alıb harasa getməyim gəlir.

Mən gec öyrəşənəm, çətin tərk edən,

Bəs nədir bu istək içimi dəlir?

 

Beləcə  buraxıb

                        bulanıqlığı

Hansı nisgilimi ovudub gedim?

Qəlbimdə boğulan diləklərimi

Necə yola verib, təsəlli edim?

 

Alıb ürəyimi, alıb başımı,

Bu yüklə özümə yer tapım harda?

Varmı elə bir yer, elə bir aləm

Məni çəkə bilsin, əriyim orda?!

***

Yaşadıq, nə yaşadıqsa,

yada salmağa lüzum yox.

Bənd olmağa

bəndə gəzsəm

çoxdur sənin kimisi, çox.

 

bu divanə, dəli könül

dəli duyğulara çapar.

Ovut çığıran istəyi,

götür özün ilə apar.

 

Ümid etmə, bir gün dönəm,

yollarıma çıxma daha.

Nə sevgim, nə nifrətim var,

get, əmanət ol Allaha.

Gözünün yaşı

ovcunda olan adamın

ovcu, əli açıq olar, ürəyi tərtəmiz.

uşaq məsumluğu gəzdirər içində,

Nə xılt qalar ürəyində,

nə yığıntı,

yuyub axıdar gözündən

ən qorxusuz,

ən güvənli adamdır

gözüsulu adam,

könlü,  kəpənək,

üzü gerçək,

üzüsulu adamdır,

            gözüsulu adam.

Sevə biləcəyin bir kimsə ola

sevgin

şübhədən, xəyanətdən uzaq

qışda uşaqların tapdağından uzaq qalan

qartək

tərtəmiz,

əsəsən üstündə

pöhrələnə

soyuğu, qışı adlayıb

baharda pöhrələnən şiv kimi.

 

Sığıb-sığışdıra bilməyəsən bu sevgini,

bu sevinci heç yerə

məst olub

sərxoş səma kimi

çətir olasan bu sevgiyə.

***

ağrıları anma, gəl,

doğruları danma, gəl.

Hisslərini gizlədib

öz içində yanma, gəl.

 

sər səcdəyə selləri,

çək yedəklə yelləri,

andığın yerdə ara

al ovcuna illəri.

 

asıl öz həvəsindən,

nərdivan qur səsindən.

yığ gözümü yollardan

çıx bəlkə qəfəsindən.

 

ovuq, ovçu həyata

xətayıq, başdan xəta.

divan tut olmazlara

nə yaşa bax, nə vaxta.

***

istəklər ümmanında

çırpınardım, yanardım,

mən dünyanı nə boyda,

necə geniş sanardım.

 

ümidlərim elə çox,

inamım lap çox idi.

yel apardı dünyamı,

yoxsa divlərmi yedi.

 

heç bir ilğım, heç bir rəng

qamaşdırmır gözümü,

bu adam yığınına

yad görürəm özümü.

 

bir nəfəsəm bəlirgin

tükənmişəm, sönmüşəm,

məkanım göylər idi

artıq yerə enmişəm.

***

Udacaq,

bu duman udacaq məni,

udacaq,

üstünə qonanları udan

ingilis şehçiçəyitək,

itəcəm, batacam bu dumanda mən.

 

Ağrı, xiffət kimi gəldi

fikrimdə, halımda az imiş kimi,

başımın üstünü  də aldı

düşdüm bu dumanın ovcuna.

 

Bu dumanda təklik, tənhalıq xofu

sarıb sarmaladı hər yeri yenə.

Bu duman

dünyanın gözünə enən  yuxu.

 

Eyni açılmayan insan kimidir

bu dilsiz-ağızsız təbiət bu gün,

çəkir duman yükün.

Həvəsi azdırıb,  sozaldır burda

belə süst, mürgülü, belə boz duman,

yönsüz, yöntəmsiz

tutqun, toz duman.

 

Udacaq,

bu duman udacaq məni

itəcəm, batacam bu dumanda mən.

***

vaxtsız yağmış qar altda,

qar altında

qalan şiv,

haqladı səni bu qar,

yarpağını tökməmiş.

o fəsili qarşıla,

bu fəsili yola sal

qarşında hələ çox qış,

hələ çoxlu qarlar  var.

əyilmə,

əyildinsə

əyilərsən, sınarsan.

alış, bərki, sirinsi,

bas bağrına bu qarı,

oxşa sevdiyin kimi,

əzizlə,

dərdlərini

əzizləyən adam tək

onda

asan olar.

 

Nəvəm Aylinin

"darıxmışdım" sözünə

 

Nazım, qızım, axı sən nə bilirsən,

sən hardan bilirsən darıxmaq nədir.

hər təzə oyuncaq,

hər təzə oyun

təzə sevincindir, təzə həvəsin,

hələ dupdurudur gözünün içi,

gözündə dünya da hələ dupduru,

hələ aldatmayıb özünü zənnin,

bir namərd önündə

bir damla yaşı

içində saxlaya bilmədiyində

özün-öz gözündən düşüb o yaşla

ərimək varkən,

karına gələndə elə ağlayıb

səsini, özünü gözə soxursan

hələ,

hələ tanımırsan bu adamları,

böyüyə-böyüyə tanıyacaqsan,

tanıya-tanıya böyüyəcəksən,

gözlərin özündən tez böyüyəcək

gözləmədiyini görəndə,

göz yummağa öyrəşənəcən

əldən düşəcək ruhun,

çox,

çox darıxacaqsan,

nazım, qızım çox...

***

Bu gecə namərdmiş, gör necə namərd,

Bu gecə ruhumuz görüşər dedim.

Gündüzlər günəşdən pay alammadım,

Bu gecə bəxtimə gün düşər dedim.

 

Yükləndi ruhuma, yüklənib durdu,

Bu gecə bir ömür ağırlığında.

Zülməti əyninə biçib geyindi,

İtdim bu gecənin sağırlığında. 

 

Gəzərsən, göylərdə gözlə, gəz məni,

Qalsam yerim yoxdur bu Yerdə  daha.

Qalda, qovğadadır ruhumla cismim,

Mənimki, mənimki qalıb Allaha.

 

 


© Müəllif hüquqları qorunur! Mətndən istifadə etdikdə istinad mütləqdir!