Dilinə pay çıxan qız
Dişləriylə dilini
Urfanə bərk sıxıbdır.
Deyir: - Bir bax, ay nənə,
Dilimə pay çıxıbdır.
Nənə deyir: - Urfanə,
Nə sızılda, nə ağla.
Səbəbini söyləyim,
Yadında yaxşı saxla.
İlkanənin, İlkinin
Noğul payın yeyirsən.
Qoz, fındığı sındırıb,
Siz yeməyin, deyirsən.
Hələ körpə Nanənin
İçirsən süd payını.
Qoymayırsan Sahilə
İçə şirin çayını.
Küsdürmüsən Günayı,
Qutabını almadı.
Qırmızı almalardan
Turala pay qalmadı.
Ancaq özün yeyirsən,
Hər nə keçir əlinə.
Özgə payı yeyənin,
Bax, pay çıxar dilinə.
Babam
nə zaman yatır
Yay tətilində
Gəlmişəm kəndə.
Babam bil, heyrət
Doğurur məndə.
Lap səhər tezdən,
Ot xotmanlayır.
Yeri belləyir,
Lək-lək tumlayır.
Su vurub arxa,
Suvarır bağı.
Alaq eyləyir,
Günorta çağı.
Hey göz gəzdirir,
Evə, eyvana.
Qulluq göstərir,
Mala, heyvana.
Qalxır çardağa,
Günəş batanda.
O, qəlyan çəkir,
Hamı yatanda.
Bunlara gücü
De, necə çatır?
Görəsən, babam,
Nə zaman yatır?
Yovşan ətridi
Kəndimizdə var
"Dovşan dərəsi",
Burda qurulub
Ovçu bərəsi.
Dərənin hər vaxt
Dovşanı çoxdu.
Həm də ətirli
Yovşanı çoxdu.
Aymir bərədən
Süzdü dovşanı.
Tanıyammadı,
Kollu yovşanı.
Bir qəşəng qoxu,
Doldu burnuna.
Baxıb babaya
Söylədi ona:
- Bu qoxu, baba,
Dovşan ətridi?
Baba dedi: - Yox,
Yovşan ətridi.
Əriştə
- O hansı yeməkdir ki,
Un ələkdən ələnir.
Sonrasa xəmir olur,
Balaca kündələnir.
Bu balaca kündələr,
Oxlovla ovxalanır.
Doğram-doğram doğranıb,
Sonra ipdən sallanır.
...Hələ onu bişirmək
Tələb edir səriştə.
Aymir deyir: - Ay nənə,
Əriştədir, əriştə.
Küftə
- Uşaqlar, bişirdiyim,
Yumru-yumru kündədi.
Kim adını tez desə
Biri ona müftədi.
Səttar dedi: - Ay nənə,
Mən deyim adı nədi?
İyindən bilirəm ki,
Bişirdiyin küftədi.
Nənəmin sandığı var
Zəhra nənənin
Bir sandığı var.
İçində hər vaxt
Qoz-badam olar.
Əgər kim sözün
Düzünü desə,
İşində ona
Kömək eyləsə,
Vaxtında yatsa,
Vaxtında dursa,
Kim öz gününü
Maraqlı qursa,
Bağçadan nağıl
Şeir gətirsə,
Məktəbdən çoxlu
"Beş"lər gətirsə,
Zəhra nənə tez
Sandığı açar,
Nəvələrinə
Qoz, badam paylar.
"Şeytan bala"
Babamın dəcəl
Quzusu vardı.
Rəngi elə bil
Ağappaq qardı.
Yaman dəcəldi,
Yaman bəladı.
Hələ adı da
"Şeytan bala"dı.
Səslədim mən də,
Gəlmədi quzu.
Göstərdim ona
Bir ovuc duzu.
Yanıma qaçdı,
Xoş görkəm aldı.
Əlimdən öpdü,
Duzu yaladı.
Düş gəl yerə, güləşək
Araz deyir: - Ay Günəş,
İşığın aşıb-daşır.
Sənə baxa bilmirəm,
Gözlərim bərk qamaşır.
Qaçıb çıxmısan göyə,
Cığallığından əl cək.
Əgər məndən qorxmursan,
Düş gəl yerə, güləşək!
Ayna
Bu şirindil, gül bala,
Mehriban qız Aynadı.
Əlləriylə tutduğu
Balaca bir aynadı.
Ayna aynaya baxcaq,
Qanı yaman qaynadı.
Aynadakı qız ilə
Deyib-gülüb, oynadı!
Günəbaxan
Günəbaxan, günəbaxan,
Ay özünü günə yaxan.
Quşlar səni dənləyəcək,
Açıq qalıb axı yaxan.
Aytənəm
- Boynubükük bitən gül,
Nə olubdu, qəmlisən?
Ağlamısan elə bil,
Ləçəkləri nəmlisən.
Səndən şeir bilirəm,
Mənə öyrədib nənəm.
Tanımadın sən məni? -
Səni sevən Aytənəm!
Çaydan
Qazın üstündə çaydan,
Özünü bərk saxladı.
Alovlar qəzəblənib,
Onu yaman dağladı.
Yazıq çaydan dözməyib,
Hönkür-hönkür ağladı!
© Müəllif hüquqları qorunur! Mətndən istifadə etdikdə istinad mütləqdir!
