DİLSUZ
MÜƏMMA
Mən bir şey anladacaqdım,
kimə anladacaqdım?
Mən bir yerə gedəcəkdim,
hara gedəcəkdim?
Biri vardı,
yanımdaydı bir az əvvəl,
kim idi o?
Mənə bir şey söyləmişdi,
nə demişdi?
UYDURMUŞLAR
Türkü oxuyurmuşam
küçələrdə,
görmüşlər.
Yerə baxırmışam, yerə,
yeriyərkən,
duymuşlar.
Sonrasını
uydurmuşlar,
uydurmuşlar,
uydurmuşlar...
EŞQ
Sən ucsuz-bucaqsız yerlərdə
qələbəlik kimisən,
Sən sahilləri bilinməyən okeanlarda
ələ gəlməyən,
sürüşkən
balıq kimisən.
Gah isidir,
gah üşüdür,
gah güldürür,
gah ağladırsan,
Sən
həm xəstəlik,
həm də sağlıq kimisən...
MƏN DEYİLDİM
Bir axşamüstü pəncərəndən
yola ağır-ağır enən
qaranlığa baxırdın,
Mənə bənzəyən biri keçdi
evinizin önündən,
qəlbin başladı
bərk-bərk döyünməyə.
Amma o keçən mən deyildim.
Bir gecə
yatağında yatırdın,
səksəndin,
mən deyildim...
Mən
çox-çox uzaqdaydım
o zaman,
özündən
asılı olmayaraq
yaş axdı gözlərindən -
məni düşünməyə başladın,
illər sonra olsa da,
eşqin
hökm etdiyi
kimi yaşadın.
Amma
göz yaşlarını
silən mən deyildim...
Bir kitab oxuyurdun,
dalğın-dalğın,
içində insanlar
sevişirdilər, ölürdülər...
Bir gün
bir gənc dəliqanlını
qətlə yetirdilər,
nitqin tutuldu -
nə edəcəyini bilmədin.
Amma
qətlə yetirilən
o dəliqanlı
mən deyildim...
DÜŞÜNCƏ
Hamının
gələcəyini zənn etmə, -
məsələn,
mən gəlməyəcəyəm...
Məsələn,
mən gəlməyəcəyəm,
həyatı anlayasan deyə,
çaşmayasan deyə,
qorxmayasan deyə…
Məsələn,
mən gəlməyəcəyəm,
bilmədiyin nə varsa,
öyrənəsən deyə,
özünə güvənəsən deyə…
Məsələn,
mən gəlməyəcəyəm,
yarıyolda
qalmayasan deyə,
mənzil başına -
özünə yetişəsən deyə…
Məsələn,
mən gəlməyəcəyəm,
milyonlarla insanın arasında
tək qalasan deyə,
tək qalasan deyə,
tək qalasan deyə…
ŞEİR DÜNYAM
Köks qəfəsimin içində,
bir yerdə,
bir şeir dünyam var mənim -
doğruları yalanlarla
anladan.
Dünyadan çıxıb,
orda yaşayaram,
orda üşüyər,
orda isinər,
orda dadaram
sevginin dadını.
Acıları,
kədəri orda unudar,
orda unudaram
çəkdiklərimi.
Bir şeir dünyam var mənim,
köks qəfəsimin içində,
bir yerdə,
qapısı
və pəncərəsi
insanla açıq,
divarları pəmbə,
işıqları aydınlıq-aydınlıq…
Özümü həbs etdiyim
gözətçisiz bir zindan…
Heç çıxmayım deyə
hər gün dua etdiyim
bir şeir dünyam var mənim,
köks qəfəsimin içində,
bir yerdə…
YALNIZLIQ
Bir zamanlar
güldüyünüzü
xatırlaya-xatırlaya
hüzn
palçığını yoğurursunuz
ovuclarınızda,
Bilirəm,
yalnız qaldığınızı
düşünürsünüz,
Bilirəm,
tənhalıq məngənə kimi
sıxır ürəyinizi.
Unudulmusunuz…
Bunun başqa adı yoxdu.
Amma,
əfv edərsiniz, var,
bunun başqa adı var:
yalnızlıq -
musiqinin səni dinləməsidir,
yalnızlıq -
insanın özü özünə
məktub yazıb göndərməsidir
və alanda açıb,
sirr kimi
maraqla oxumasıdır…
Bir zamanlar
güldüyünüzü
xatırlaya-xatırlaya
hüzn
palçığını yoğurursunuz
ovuclarınızda,
Bilirəm,
yalnız qaldığınızı
düşünürsünüz,
Bilirəm,
tənhalıq məngənə kimi
sıxır ürəyinizi.
Unudulmusunuz…
Bunun başqa adı yoxdu.
Amma,
əfv edərsiniz, var,
bunun başqa adı var…
SÖYLƏ
Bu gözlər səni görmək üçündür,
Səndən başqa bir şey varmı ki?
Dənizlərə baxıram, dənizlərə…Dənizlər bu qədərmi ki?
Baxıram, başqa şeylər görüm deyə,
Güllər əzilib-büzülürlər qarşımda.
Çiçəklərin ömrü üç-beş saniyə,
Bir eşq havası dolanır başımda.
Ulduzlara baxıram, ulduzlara,
Təkcə sənsən mənimlə baxan,
Nə oldu, görəsən, bu biri insanlara,
Mənə bir söz söylə, həyatı aydınladan…
Bu gözlər səni görmək üçündür,
Səndən başqa bir şey varmı ki?
Dənizlərə baxıram, dənizlərə…
Dənizlər bu qədərmi ki?
SƏNİ GİZLİ SAXLAYACAĞAM
Səni
gizli saxlayacağam, inan,
yazdığım şeirlərdə,
çəkdiyim rəsmlərdə,
oxuduğum türkülərdə…
gülsəm - gülüşümdə,
ağlasam - göz yaşımda…
Səni
gizli saxlayacağam, inan,
varsan, yoxsan -
kimsə bilməyəcək.
Yaşayacaqsan gözlərimdə!
Təkcə sən duyacaqsan
sevgimin yaz hənirini,
xəyallarımda uyuyacaqsan,
xəyallarımda oyanacaqsan…
Görəcəksən,
gələn günlər bənzəməyəcək
ötən günlərə -
daha məsud olacaqsan.
Bir sevgini
anlamaq üçün
bir həyat xərcləməlisən.
Xərcləyəcəksən!
Gözlərimi qapada bilmirəm,
gözlərimdəsən.
Qorxma, səni
gizli saxlayacağam, inan,
yazdığım şeirlərdə,
çəkdiyim rəsmlərdə,
oxuduğum türkülərdə...
HƏR NƏYSƏ...
Türkiyədə İstanbul nədisə,
İstanhulda gecə nədisə,
Gecədə gəzmək nədisə,
Gəzərkən düşünmək nədisə,
Həm də
səni unudamamaqcasına
düşünmək nədisə,
Səni sevmək nədisə,
Deməyim,
yox, deyim deyərkən
Birdən eşqə düşmək nədisə…
Eh, uzun söhbətdir,
Hər nəysə...
AĞLAMA
Ağlama.
Ağlamaq -
hüznlə barışmaq,
yaşla qucaqlaşmaqdır.
Ağlama.
Ağlamaq -
ağrıya sığınmaq,
acıya əl açmaqdır.
Ağlama.
Ağlamaq -
çarəsizliyi,
ümidsizliyi yola verməkdir.
Ən çətini
susmaqdır, susmaq...
Susmaq -
elə bir ağacdır ki,
budaqlarında
iri-iri
gözyaşları yetişir.
Ağlama.
İSTƏK
Rüzgarmı dedim...
İstərəm ki, saçların dağılsın,
Gecəmi dedim...
İstərəm ki,
həmən düşüncələrə dalasan,
Eşqmi dedim...
İstərəm ki,
ürəyin bərk-bərk döyünsün.
Gecənin bir vaxtı
sabahmı dedim...
İstərəm ki,
oyanasan,
oyanasan,
oyanasan...
XOŞCA QAL
Pianonun
ağ-qara dillərində
sənə dair
bir türkü çalıram -
çoxalırsan,
çoxalırsan otağımda,
sən çoxaldıqca,
mən qeyb oluram,
qeyb oluram...
Gecə
sancı çəkə-çəkə
doğur səni,
Aya baxıb -
adını qoyuram.
Hər şey sən olur:
bulud - sən,
dəniz - sən...
Və mən qeyb oluram...
Ölürəm,
ölürəm,
ölürəm...
Səsini duyuram yuxularımda,
gözlərimi qamaşdırır
Ay camalın,
rüzgar
sənin kimi
toxunur mənə -
dirilirəm,
dirilirəm,
dirilirəm...
Eşitmək istədiklərimi
söyləmirsən heç,
əllərin toxunmur əllərimə,
sənin kimi bir şimşək çaxır,
düz qəlbimə düşür ildırım -
və mən yenidən ölürəm,
ölürəm,
ölürəm...
Xoşca qal,
Xoşca qal,
Xoşca qal...
AYNA OYUNU
Bir çocuk doğuldu -
mən idim,
Növbəyə durdum
insanlar içində.
Oynaya-oynaya böyüdüm
odalar, meydanlar içində...
Bir ayna doğuldu - gördüm,
Növbəyə durdu
aynalar içində,
Xoşuma gəldi, aldım,
çarşılar, bazarlar içində.
İllər boyu
üzünə baxdım,
Sifəti heç dəyişmədi
olanlar içində,
Bir səhər
yuxudan ayıldım,
Qarşımda dayanmışdı,
adi bir şüşə kimi, -
üzü-gözü çat-çat...
Mənmi aldanmışdım,
Yoxsa,
omu özünü
ayna zənn etmişdi,
Yoxsa,
aradan, sadəcə,
uzun bir zamanmı keçmişdi?
Bilmədim,
Bilmədim,
Bilmədim...
SƏNDƏN QALAN
Bir şey qaldı
gecələrin birində
səndən,
Əvvəllər
heç hiss etmədiyimiz bir şey;
Məsələn,
qaranlığın düz ortasında
qıpqırmızı bir xal...
Kəlmələrin içində
kəlmələrdən böyük
bir şey qaldı səndən,
həyat qovğasında
çırpına-çırpına...
Bir şey qaldı
bir dənizin sahilində
səndən,
Baxış-baxış, söz-söz,
amma səssiz-səmirsiz;
səninlə dolu,
amma sənsiz bir şey -
axtardıqca bulunmayan,
bulunduqca axtarılan...
İÇİMDƏKİ ŞEYTAN
Sənin yanına gəlirəm, sənin,
içimdəki mələk,
yalnız sənsən
həqiqəti söyləyən,
yalnız sənsən
lazım olanda
uçub gedən,
lazım olanda
uçub gələn...
Sənin yanına gəlirəm, sənin,
içimdəki mələk,
Susmamaq üçün...
Çünki sənsən
dinlədikcə dinləyən,
baxdıqca baxan,
gördükcə görən...
Sevməyi yaxşı bilirəm,
düşünməyi öyrəndim,
Duydum
nədir can vermədən ölmək.
Artıq bütün qapıları
açıb-örtə bilirəm,
Yalnız
sən anlayarsan
bunlar nə demək?
Sənin yanına gəlirəm, sənin,
yalansız-filansız,
Olduğu kimi
danışacağam hər şeyi;
bil və bilsinlər -
sən
güldürdükcə güldürən,
öldürdükcə öldürən
və ölməyənsən!
HƏSRƏT
Bir gecə...
Gecənin içində
bir yuxu...
Yuxunun içində mən...
Uyuyuram,
Yuxudayam,
Yanımda sən.
Yuxumun içində
bir röya,
Röyanın içində
bir gecə,
Gecədə mən...
Harasa gedirəm,
Dəlilər kimi,
Ağlımda sən.
Səni sevirəm,
Gizlicə-gizlicə...
Hüzurunda
əl əl üstə dururam,
Üzünə baxıram,
Söyləmədən tək kəlmə.
Səni itirirəm
Qaranlıq bir anda,
Birdən oyanıram,
Baxıram,
hər yan işıqdı,
Uyursan yanımda,
Gözəlcə-gözəlcə...
MƏNZƏRƏ
Buram-buram işıq saçan,
Rəng-rəng dənizlərdən keçən.
Solğun bir gəmidir yalnızlıq,
Gözlərdə dumanı qalır.
Ağır-ağır çökür gedir,
Ümidləri uçur gedir.
Ardında bir qaranlıq,
Bir də limanı qalır.
Nədi xatirələrdə çaxan,
Məni sahillərə çəkən,
Mayakmı? Yandı, söndü
bir anlıq,
Sönəni gedir, yananı qalır.
Quşmu, buludmu uçan,
Ömürmü, gözdən qaçan...
Bir dünyadı - bağrı yanıq,
Gedəni gedir, qalanı qalır...
Hazırladı:
DİLSUZ
© Müəllif hüquqları qorunur! Mətndən istifadə etdikdə istinad mütləqdir!
