Yağış yağanda ağlama... - Furqan SADIQOV - şeirlər

Ad günüm üçün

Hələ canım üstümdədi,

yük altındayam hələ...

Göy üzü var başım üstdə,

kök altındayam hələ...

 

Yaşamaq kiminə asan,

kiminəsə zülümdü...

Bu gün ad günüm deyil ki...

bu gün mənim ilimdi...

 

Görəsən, mən öz ömrümün

harasında durmuşam?!

Sərhəddəyəm, iki ilin

arasında durmuşam...

 

Bütün yollar qırılır

Ümidlərim tükənib,

yenə bir qab verərsən...

Ehtiyat yığmaq üçün

mənə bir qab verərsən...

 

Bütün yollar qırılır -

hər tərəf yarımçıqdı...

Yaman tez sürüşürəm,

xəyallarım palçıqdı...

 

Mənə bir şeir yaz, dost,

hopum hərflərinə...

Bir az ürək-dirək ver,

yaz nisyə dəftərinə...

 

Yağış yağanda ağlama

Yağış yağanda ağlama,

göz yaşını yuyar su...

Yağış yağmayanda ağla,

tükənər, quruyar su...

 

Yuxun ərşə çəkilibsə,

sən yerdə nə gəzirsən?!

Həyatda yaşayammırsan,

şeirdə nə gəzirsən?!

 

Ömür nədi - bir addım yol,

bitəcək addım atsan...

Dərdim dəvə boydadı ha,

qar yağacaq oynatsan...

 

Hamıya

Zaman heç yana getmir,

elə saatda qalır...

Çünki itirilənlər

həmişə yadda qalır...

 

ürəyim nələr çəkir,

nə bilsin ürəksizlər?!

 

Ha yana gedirəmsə

bütün atdığım izlər

ayağım altda qalır...

 

Heç kəsə

Hər gün bir kərpic ucalan

bu qəm ev deyil hələ...

Üstünə güllələr yağan

bu can ov deyil hələ...

Guya nə üçün yazıram,

yoxdu bu şeirin ardı...

Mən sıxıram dişlərimi,

dünya dişin ağardır...

 

Hardan biləsən?!

Çapıqları küləkləri qarğıyan

budaqların mehistəməz halından

daha betər olmaq belə olurmuş...

 

Sızım-sızım sızıldayan, ağrıyan

xəzəl olmuş yarpaqların xalından

daha betər solmaq belə olurmuş...

 

Sən hardan biləsən, hardan biləsən

payızların mənə çəkdirdiyini?!

Uzaqlar

Dənizin ortasında

hər şeydən uzaq düşən

kiçik bir ada kimi,

sükut içərisində

bir sıldırım qayaya

dəyib geri qayıdan

səs kimi, səda kimi

yalqızam, canım-gözüm...

 

Bir deyən də yoxdu ki,

ay evin yıxılmasın,

belə yaxın dost olma

həsrətlə, intizarla...

 

Axı özün bilirsən,

həsrət binokl deyil,

yaxın gəlməz uzaqlar...

 

Qorxu

Təzəcə oyanıb, qalxıb

birfəsillik yuxudan,

Çiçəkləyən ağaclartək

titrəyirəm qorxudan...

 

...yadındamı, keçən il də

lopa-lopa qar yağdı,

əriklərin çiçəyini qurutdu?!

gör indi ağaclar da

mənimtək necə qorxur...

 

Gör necə də bənzəyir

adamlara ağaclar,

ağaclara adamlar...

...sən də insafsız olma!

o bumbuz ümidsizliyi

bir də yadıma salma...

 

Hamı yatıb yoxlayır ki...

Nə istəyir ağcaqanad

səndən bu yay gecəsi?!

Görəsən, ətin dadlıdı,

ya qanın içiləsi?!

 

Hamı yatıb yoxlayır ki,

ölümünə hazırdı?!

Dilinə bir şeir gəlir,

qulağına vızıltı...

Eh, at getsin şairliyi,

at, yaxına düşməsin...

Var gücünlə uzağa at,

ayağına düşməsin...

 

Bir qocanın saatsaza dedikləri

Gəl zamana tərif verim,

sən də otur, qulaq as...

Divardakı saatlardan

birin götür, qulaq as...

 

Saatlar məcburdu vaxtın

leşini daşımağa...

Elə vaxt olur vaxt olmur

başını qaşımağa...

 

Ölərmi əqrəbi geri

dönsə saatlarının?!

Mən günlərimi sayıram,

sənsə saatlarını...

 

Dilimdə bir söz sınar

Qışda göz yaşım donar,

donub yazacan qalar...

Üstünə qar da yağar,

yağıb dizəcən qalar...

 

İçimdə bir köz yanar,

gün keçər, gecə qalar...

 

Dilimdə bir söz sınar:

sənə bir heca qalar,

mənə bir heca qalar...

 

Yağış

Bu yağış nə yaman haqladı bizi,

evdə dustaq kimi saxladı bizi...

 

Hamı bu yağışdan qaçıb gizlənir,

inanmıram kimsə göyə dırmana...

Çəksəm ciyərimə torpağın ətrin,

torpaq olanacan bəs edər mənə...

Nə xoş...

 

Amma ki,

şıdırğı yağmaqla döşünə döymə,

belə az öyünə bilərsən, yağış...

Bu evin damını boşuna döymə,

qapıdan buyura bilərsən, yağış...

© Müəllif hüquqları qorunur! Mətndən istifadə etdikdə istinad mütləqdir!